2018年2月20日星期二

成就感

歲晚大掃除因為重感冒而半途荒廢,有好多清潔活動都冇做到。咁過年就梗係唔做啦。到過得年初三,就更加唔駛講,啋佢都傻,唔做!

不過,有樣野耿耿於懷,就係我原本滿懷大志,要拆開部古老擴音機來清理。事緣呀,機又舊,香港又潮濕,我又係爛煙民,擴音機內部的金屬接觸點,因為污垢累積而產生嘈音,最明顯係一些急速轉強的音符,一踩油就好似屙爛屎咁呼~~~一聲,真係掃興之餘,又覺吵耳。

昨日我終於頂佢唔順,拆開部機來大掃除。其實工作唔難,只係要拔去連接線,和事後插返,係好煩厭的事,有呢個重大阻力,所以拖得就拖。但當你洗濕個頭,拔左第一條,就要繼續落去,所以有時做事,係要監粗捉左新娘上轎,咁就會事成。

過程都冇野好提,簡直係弱智低能兒都識做。不過做完就效果驚人,哎哎,點解唔一早做呢?而家音色真係清、爽、滑,聽左我一日都唔捨得熄機。

呢個係狗狗年的第一大成就!

2018年2月17日星期六

什麼我都有預感

今日呀,已經要做野,又資料輸入,又要編程式,測試,攪左個幾鐘,結果好滿意。攪完都冇心機煮食,就走落街睇下點。

行到AEON,人多到仆街,但係乜都唔想買。再過街市,心諗,如果雞佬唔太大咬,斬半隻雞開年都好。去到一睇,四十蚊半隻白切雞,平時係卅三,都算合理既。下午差不多四點,已經所餘無幾,就買佢啦。回程又行到荃新天地,個心突然想起某人。

入到去,都係一般節日擺設,人流不太多,有檔唔知乜野,原來係消費夠幾多錢,就可以代你拍照和打印。搵笨。掉頭走,果然,就見到扶手電梯有條友上來,仲唔係阻頭阻勢死老坑!佢睇我唔到,我就大聲嗌:老坑!佢一驚回頭,大家嘻哈恭喜恭喜。跟住佢就話要返屋企。

嘿!條老坑識左廿年,好似一封過年利是都未畀過我。

我就係咁,成日有呢D預感,不過就唔係好全面,如果我預知條友唔派利是,我就連叫佢都慳返啦!


2018年2月16日星期五

新年送

呢個係冬菇蠔豉炆鴨掌,個芡杰過西米露,不太成功。


循例煮個齋。今年袋裝齋唔足料,要私加冬菇和木耳,甘笋和西芹。


2018年2月15日星期四

年卅晚

昨晚幾點訓?好似都成十一點,輸馬輸到眼光光先肯上床。但係一覺訓到差不多七點,真係難得。或者係重感冒帶來的另類福利。

今朝起身,用了九秒九先可以坐起身,感冒令人四肢痠軟,好辛苦呀。其實昨晚一早想好今日行程,就係天光就上象山早茶。人飲茶我飲茶,我飲到好似簽左約,欠左人咁,某間茶居太耐冇去會覺得對人唔住,過年要在收爐前去一去,問定幾時開市。象山呢間就年中無休,樓下一間就休到新十一,川龍就初三開市兼燒炮仗,年廿八已經講好叫佢等埋我先好點火。飲茶飲到咁多牽絆,真係笨實。

一早落樓,見到肥貓老竇已經在洗鐵閘,真係好勤力呀!肥貓都好幫得手,年年過年過節,都出來吶喊助威,拉客搵生意,養著如此一等好貓,真係佢老母的福氣。


今日仲有好多野做,大掃除我睇要到此為止,我好辛苦呀,唔好要我做咁多野啦。不過一樣野一定要做,就係還神,還乜野神?梗係食神啦!


今年多左一位,就係咪神。不過咪神仍然怕陌生,唔肯讓我摸。

又,買左鴨掌返來炆。幾隻雪藏腳板就要十一蚊,仲駛乜去打劫銀行丫,開凍肉舖咪得囉。鴨腳啤水係一個問題,但係我聰明無敵,想到一個絕頂好方法。就係將袋鴨腳縛在水龍頭,開細細水喉由得佢注滿膠袋,在袋底剪個口,咁咁咁咪得囉。

唔講咁多,仲有好多野做,做死我囉。。。

2018年2月14日星期三

記得、記得

過去幾日,一路作病作病咁。到昨日大掃除,洗廚房的油污,真係洗到我仆街,另外又要洗衫收衫、洗衫收衫,結果就咁發作。半夜就病醒左。

兩肩痠痛到不得了,加埋本身的五十肩,真係痛不欲生。唔知點解,就連每一寸的皮膚,都刺刺痛咁。唔咳尤可,一咳,又係撕心裂肺,扯到個頭都痛埋。

個人唔精神,就乜都想唔到,本應某種感冒,會有某種對治的中藥,但係我的狀態、就係乜都想唔到。

捱住咁去草草完成埋衛生工作,再落街食埋個午餐,就返來一覺訓。果然,訓完係好D,再沖個熱水涼,稍為有好轉。流住兩行鼻涕就走出街,去萬寧睇下有乜靈丹妙葯。冇錯啦,係葛根湯,可以消減肌肉痛,立即就買返屋企沖來飲。對症的,飲落立即就覺得好正氣。漸漸就有好轉。

今晚都要早D訓,希望明日可以更好啦。不過,有樣野一定要做,就係浸定冬菇,明日要煮年夜飯,冇冬菇點似樣呢!

2018年2月9日星期五

用了$148來認證

自從香港的數碼廣播全面仆街,香港電台第四台深夜時份轉播英國BBC電台節目,不再和第三台聯播,變左阿叔我冇音樂聽。一個孤獨老人深夜時份特別孤獨,如今連唯一慰藉都冇埋,真係仆街。

我都試過另求自慰途徑,發現商台有余宜發的節目,播的歌中西日都有,而且條友講野唔乞我憎,都係一個好選擇。但係佢節目要凌晨兩點先開始,咁之前的幾小時叫我點呀?捱唔到呢幾粒鐘,我會跳樓架。

我又搵過仲有乜方法可以聽到原有的第三台節目。一、搬去天水圍,該處有RTHK3FM廣播,不過不設實際,否決。二、上網用手機APP聽,但係我個手機服務只得2G數據,唔夠我排遣寂寞,有待電訊商大減價。三、轉聽AM567千赫廣播。

結果經過顧問公司的研究,報告出來,阿叔,你聽AM啦!

於是又要想辦法。首先,我家中的收音頭收AM有問題,經過我再搵另一間顧問公司去研究,多方探討,發現係家中太細,四圍都係電磁波,AM收音最忌呢家野,所以一轉AM就只聽到嘈音。再深入探討,發現係一個叫做訊嘈比的問題,大大座的收音頭唔得,反而細細部的原子粒收音機就冇問題喎。

唉!今時今日,聽AM已經被人笑,仲要用部七十年代阿伯用來聽馬仔的原子粒收音機,拎出來都笑死人。但係聽音樂重要,四圍搜尋,終於搵到,$148,仁濟醫院急症室入口對出的電器舖有售。可能醫院入邊的公公婆婆都要聽收音機,所以在該處賣係大有市場。

我又試過上淘寶搵,有D國產的,只賣50人仔。但係宣傳口號令人討厭,話呢部係敬老牌,最合買畀長輩用。有左呢個LABEL,帶有呢個STIGMA,我就唔撚幫襯你喇。

死死氣去仁濟外面的電器舖買。多口問個售貨姐姐,問佢係咪多數老人家買?點知佢望望我,話:阿伯,咁你都唔知?老野死一個少一個,靠佢地我執笠啦!而且連老野都用果D可以播MP3架啦,而家多數係學生為考公開試聆聽試先來買呢D機架。

於是乎,我花了$148,證實了我係一個和社會脫節的死老坑。