2017年10月20日星期五

+44 70 

昨日早上,電話響,雷電顯示係+4470XXXXXXX,接聽,冇聲,收線。今朝又響,接聽,有人講英文,唔知乜鄉下的英文,叫得出我名喎。

44:Hello, I'm calling from London, UK. 哈囉,我從英國倫敦打來的。

我:Really? I know fucking no one in UK.  It's around 4am in UK, what the fuck keeps you up so late? 係咩?我英國唔撚識人喎。而家英國四點鐘,你咁撚夜都唔訓?

44:Well, recently you showed interest in making money online, that's why I call. 咁既,我得知你想在網上發財,所以打電話過你囉。

我:That's not fucking true.  I have enough money, and want to enjoy life, I don't know how the fuck you got to know my name and my number, please take me off your fucking list and don't fucking call again. 唔撚係喎,我夠錢駛,只想好好過日子,你唔撚好再打來。

44:~~~~~收線。

之後上網查,+44 70字頭的,極大可能係尼日利亞笨實騙徒打來搵笨實。真係煩,電騙都國際化。

反黑

昨晚竟然失眠,眼光光好似飲左豬肉湯。典來典去都訓唔著,見已經過十二點,就起身開電腦,睇最新一集反黑。

聞說呢套劇,係大陸資金拍香港題材,用香港演員,在香港拍。

其實我自細係唔睇電視乜滯,更唔會追劇,連當年十分轟動的上海灘,我都冇睇過。不過呢套反黑,我不知不覺由頭開始追住睇,連家中上網有問題,我都拎部平板去體育館上網睇。

劇本我就唔認為係頂級,導演技巧,算係上級,我係睇班演員。成套野,最具人氣算係陳小春了。有名氣但過氣的就有吳孟達吳家麗,不過呢類演員就出場遲死得早,相信都係錢銀關係。演員大部份都係我青春期就已經拍戲,有陳欣健陳惠敏黃樹棠廖駿雄︔有部份係我以為一早離開了娛樂圈的,如吳毅將彭敬慈王合喜;有兩個星二代算係新人,姜文杰和柯有綸;最大部份係見過但唔知乜名,可能係亞視執左笠收唔到人工的演員藝人。

我喜歡睇的原因,係班演員做得好。咁吳毅將一企出來擺個凶樣,都唔駛講係似黑社會啦。盧惠光一路都係打星,不過拍左咁多年野,演技都好有張力架。陳惠敏演黑社會阿公,都不知幾多百次囉,邊個夠膽話佢唔得。仲有好多,不能盡錄。

從消極一方面睇,香港仲有鬼戲拍咩,班演員有機會演出,當然係嘔突都要做到最好啦。積極睇,有班演員,根本係浸淫左幾十年,冇機會睇佢地係大家損失,呢次真係唔知乜野因緣,可以組合成呢個機會。真係值得睇。

老化了的充電池

病來病去,又唔死得,又好唔晒。有時坐響處,突然就有好虛弱的感覺。

情形就好似一舊老化了的充電池,明明叉通宵,顯示係爆滿,但係行行下,好似漏水咁漏晒電,要緊急關機。

乜都唔想做,想都做唔到,做都想唔起。搵個回收箱捐入去罷啦。

2017年10月17日星期二

食粥

有個老坑笑話。在茶居中,賣點心的推住部車叫賣,現在已經冇呢支歌仔唱,再過幾年,後生的聽到呢處就會叫你收皮。

喂!花生魷魚地豆粥,仲有茨實鮑魚同雞!

有茶客聽到,咁多料?抵喎,就叫了一碗。點知粥來到貨不對辦,只有花生,就質問個賣點心的。賣點心的講:冇錯呀,係你攪錯!我係話花生尤如地豆,仲有條柒鮑魚同雞丫!

===

我臥病在床之時,冇胃口,好想食粥,好想食菜乾陳腎𧐢豉粥。菜乾清香,陳腎鹹香,𧐢豉濃香,死人食完都返生。到我精神好返D,就提起環保袋,落樓下街市買料,最後去到豬肉檔買排骨。豬肉佬問我,要肥還是要瘦?我話要肥啦。佢再問一次,我又答多次。點知佢跟住就擺出個戰鬥格:拿!係你話要肥架!

哇!咁即係點?一副有乜事你自己承擔咁?買你D排骨咁長手尾???本來我應該一句屌你老母!我話你老母隻蟹又瘦又肥呀!跟住就走人唔啋佢,但係佢有張刀在手,我又有病在身跑唔得快,只好忍氣吞聲,畀錢拎貨就走。

之後我一直想,到底乜野事?條友在呢個街市都好長日子,我間中幫襯,冇過節丫,做乜佢咁樣呢?我畀錢佢賺,佢做乜要攪到大家對立咁呢?

我寫到呢處,都唔知點寫落去。可能係宇宙間的一個大秘密,我未能參透。

死亡演習

上星期三,天氣很熱,家中熱到似個焗爐,於是出街行行。一行入商場,就連打三個乞兒,鼻水不停地流,唔止從鼻流出,仲由眼睛淚管流出。再行多幾步,成個人好似想訓低,全身乏力,四圍張望,想搵個靚女就挨埋去,奈何半個似樣的都冇。

之後都唔知點樣捱到返屋企,爬上床就訓。第二日,只覺天旋地轉,乜都唔駛做,又訓。去到唔知幾點醒來,想起街坊死鬼CAP帽大叔,前年佢就係咁,天冷入廠,出返來天氣一熱就訓低,從此永別。心諗,如果我都可以咁樣了斷就好囉。

於是乎,乜都唔諗,因為諗乜都係白諗,只好攤響床。心中覺得,咁樣真係好正喎,無憂無慮,了無牽掛,咁樣境界,夫復何求?

點知事與願違,又唔死得。天光起來,冇左頭暈、但就開始咳嗽。磨下磨下,個人精神又好返D,但係成日半夜咳醒,成日發瘟咁。

到個人叫做清醒D,回想那一刻乜都唔駛諗的經驗,冇錯嘞,就係咁,他日要死之時,記住咁樣做:而家已經冇野要諗,咁就會好安詳,好安樂,解脫一切,不復後有,拜拜!

我真係又好彩,又聰明有智慧噢!

2017年10月13日星期五

重病

今次來得急,不如唔好醫,埋單伙計唔該。

2017年10月10日星期二

市井智慧

昨晚發生件小事,遇到條老粗,真係激得我死。不過想真,嬲又有乜用?呢D人,除非你拿把刀斬開佢九碌,講乜都冇用。人老左,欲語還休。以前我一定即時就出文發洩啦,而家提都懶得提。

有時呢D人,冇得同佢講道理,但係佢地有時講野,又好有道理。

好似之前我提過,去某茶居早茶,聽到人講:食得好、死得早。早幾日行山,又聽到人咁講,係一個FULL VERSION:食得多、病得多;食得好、死得早。嘿!咁就全面勒。其實真係好真,而家除非住在動亂地方冇啖好食,否則全部都係食出病來,咁病多了,咪死囉。

又有一句:口賤心善、口甜人賤。以前遇過一條友,人人都叫佢做喪佬,但係個個都同佢好老友,因為佢喪,乜都冇收藏,唔會陰你。後生時或者會怕口賤的人,佢地不留情面,挖你瘡疤,令你丟臉。但係人老左,反而會留心口甜的人,哥前哥後三分險呀。指出你不好的地方的人,反而係你的貴人。笑騎騎咁同你講野既,先至正仆街。

阻頭阻勢死老坑,都成日好多金句。佢講過女人三大,和男人三大禍患。女人的我唔記得左,男人三大,就係乜乜、物物、屙尿慢。乜乜、物物,因為太粗鄙,我就唔提了。咁我都問過佢,屙尿慢又關人事?佢話:梗係啦,你阻住人地屙丫嘛,仲唔夠仆街呀?

但係大家又要小心,唔係順口和流行的都係對的。好似:1234567,多勞多得。你以為就係咁簡單,咁你就仆街了。又好似有條八婆講過:官到無求膽自大。你以為真係咁?佢係講畀佢老細聽啫,詐詐諦表明心跡,等佢放心,自己唔會威脅佢架。

早兩日呢條八婆又走出來講野,對住班有罕有疾病SMA的人,先講人地藥廠冇打算將藥物引入香港,然後又承諾乜乜七七。

拿,呢D就係口甜人賤勒。