2017年12月9日星期六

乘勝追擊

昨晚食過純素火煱,當堂好瞓左,冇平時咁多夢,又冇話半夜咳醒,一覺訓天光。

落樓下早茶後,返來開個大,真係大出貨,質量俱佳。

個人精神爽利,於是上城門走返轉。開頭諗住揸流攤,行到半閒亭睇下風景就折返,但係覺得狀態唔錯,就一野踩上鉛礦坳再過大埔墟。一場來到,當然要食我心愛的魚蛋粉啦。原來又加左兩蚊,而且要等成接近半個鐘,坐到個人都屎忽痛先食到,不過都值得既。

食完搭車過元朗,陽光普照,旅途愉快。又食左兩個大同老婆餅,遊左一輪咁就返屋企。

心諗,咁好反應,橫掂屋企仲有材料,不如再來一劑。走去超市買D急凍青口,細細包只係十六銀,岩晒我一個人食。

又打一次邊爐,真係正。

2017年12月8日星期五

純素火煱

入冬後天氣乾燥,呢排又懶得煲湯,個人覺得唔多妥。有時失驚無神會咳兩聲,有時仲半夜咳醒。本應煲返個西洋菜湯來潤下既,但係另個仲有燥熱問題,我估要食下蘿蔔,散下內熱。

於是乎,今晚來個純素火煱。用白蘿蔔,秀珍菇,和大豆芽來熬個湯底,淥下西洋菜,豆腐,金針,雲耳,海帶,和鮮冬菇。食左成晚,因為冇澱粉質,所以唔會飽飽滯滯。冬菇好滑,蘿蔔好甜,唯獨西洋菜冇乜味。

唔~~~我估明早會去得好暢順。

2017年12月7日星期四

亂鳩咁來的年代

以前香港有個港督在任時猝死,後來在職場中,常常聽到一句:公司點會冇左某人唔得?香港冇左港督都得呀!

呢句說話講就漂亮,但係唔係間間公司做得到。

我估就快又會有另一句金句,D人自把自為,亂鳩咁來,可以話:乜野唔得呀?美國總統都係咁呀!

開頭以為北韓金仔夠晒癲,而家睇落,佢反而係做實事的人,國民或者係食唔飽,不過國家安全現在有保障,冇人敢郁佢。

美國條癲佬,就難攪得多,以前簽落D國際協議,可以唔認數,要由頭再傾過。仲專門做D其他國家反對,癲覆現有平衡的事。耶路撒冷咁敏感的地方,佢都唔理其他國家意見,獨斷獨行,將來會點,就冇人知,或者咁樣打開個新局面,真係帶來和平?如果係咁,真係要寫個服字。

不過現在佢肯定激怒好多人,聖誕節美國人會唔會有個平安的平安夜,唔知咯。

2017年12月5日星期二

亂鳩咁睇事件簿

今日係講你,各位看官,冇錯係你。

我翻查紀錄,十二月一日出的《亂鳩收錢事件簿》,點擊率,係出奇地高。

我百思不得其解。我估,呢個世界真係亂鳩咁來,連睇BLOG都亂鳩咁睇。

2017年12月4日星期一

亂鳩咁摸事件簿

家陣地球一體化,某處發生某件事,可以好似一串炮仗咁,圍住地球逐個引爆。先有電影明星被揭多年前性侵細路,一不離二,跟住就在體育界引爆,終於爆到來香港了。

你都要佩服某D人反應之快,第一時間就飛身撲出來認自己都係過來人,佢老母又可以用呢件事出多本書。不禁令人擔心,會唔會有人趁呢個熱潮,出來老屈人呢?攪到人一身屎,然後話自己信左二郎神,已經原諒左條仆街勒,又冇左件事。

D體壇行政人員,循例話會為教練訂立指引。我就覺得你D指引真係好偉大。一早就有法律,有宗教,有道德人倫,講到明你做呢D野就會坐監,落地獄,但係D人咪一樣都要做~~~唔通你D指引有乜野秘密武器咁厲害?可以鎮得住D人的心魔?

教練有色魔,教師有色魔,唔通唔返學咩?可能屋企個外傭會侵犯個細路喎。我睇都要著黃蓉件軟猬甲,上面餵有劇毒,摸親都好似楊康咁死得肉肉酸酸,咁就有保障勒。

2017年12月1日星期五

偉大的婚外情

睇完東野圭吾呢本小說秘密後,真係好。

童話故事,結局梗係話王子和公主結為夫婦,之後就幸福得不得了,直到永遠。呢本小說,就係​大兜亂,日本仔真係有料到。

故事係講一家三口,原本過住幸福生活。兩公婆和一個讀繄小學的女生的家庭。兩母女要返鄉下,結果途中交通意外,個母親瓜柴,個女幸存。但係後來發現個老母的神識入左個女身中,即係表面係一個小學女,其實係佢老母。

開頭個老豆都困擾,但係是但執返個,好過冇啦。不過問題來勒,卅幾歲的思想,十幾歲的肉體,點收科?

個女/老婆發覺自己可以從頭再來,決定唔好客氣,要將來入讀醫學院。發奮讀書。

攪下攪下,老公發現個唔知老婆定女,年紀漸長,青春少艾,大家愈走愈遠,佢又有男同學追喎。點算?

結局就係、個老公接受左,認為心愛的人的幸福最重要,將個女,其實係佢老婆,由得佢嫁畀人。

吊詭就在這裏。一般故事就係一對男女幾經困難先可以結合,話以後好幸福咁就收場。而家係一對已經結合的,原本好幸福的,因為呢件事,漸漸有了分歧,要大家接受分散,然後女的再開始一段關係,咁、係咪一定Happily ever after 呢?

高。

亂鳩收錢事件簿

做人真係艱難,隨時有金錢損失。

因為唔關間舖頭事,係個人問題,所以我唔開名勒。

第一單我係路人甲,去連鎖店買白粉。排隊畀錢,前面有個阿婆,見個收銀找返幾草野過佢,然後講多謝、下次光顧。阿婆話我吊你咩,我畀五百蚊你,你找返咁少錢過我。見個收銀忙忙亂,阿婆又碎碎唸,我一轉念就知乜事啦。張單卅二個半,阿婆畀五百,然後忽然話畀兩個半你。咁個收銀就亂晒籠,拎計數機計一大餐,但係就錯鳩晒。

再攪一大餐,收銀找左四百七十二個半過阿婆,阿婆冇出聲就收錢走人。個收銀睇樣未夠卅歲,又唔係微積分,咁都計錯?找多兩個半畀人,埋數埋唔到,唔知會點。我當然唔出聲啦,阿婆我都吊埋點算呀?

第二單我就係受害人。去便利店買大麻,用八達通付款,只怪我動作太快,一野就拍埋去,但係眼尾睇到多左兩個項目,就係避震袋兩個。我同收銀阿姐講,我吊你咩,做乜收多我錢,佢先話唔好意思,之前個同事查價錢,唔記得取消,攪一輪先回返現水過我。

第三單係超市,買霹靂可卡因,又係八達通,又係太快,嘟一聲,但係好在我知價,知佢收多左我一倍錢。我話我吊你咩!咁個收銀先至話唔好意思,攪一大輪先回返現水過我。

第一單個收銀就完全係唔應該做收銀,講完。第二第三單,其實有出蠱惑嫌疑,如果我唔吊佢,轉頭就走,佢地就可以吸現水。

唉!雷教授唔知有冇考慮到,當你連叫雞都可以用支付寶咁方便,會唔會衍生一D科技罪犯,嫖客一唔小心,或者嫖到溫溫沌沌腳軟軟,就好易多付好多金錢,在經濟學上,呢D冇資產增值的行為,冇計入GDP,M2流通量計少左,到最後會點呢?