2017年8月13日 星期日

默契

話咁快,食神已經五歲。網上好多人都認為,呢種狗係特別蠢,就算食神老豆,都成日話佢蠢到死。

食神好似成兩、三歲先至識得聽指示去坐,坐左大半年,先學識畀手。到而家,都未有第三招。

最近睇到一個報導,為食神平反。條友話,呢種狗唔係特別蠢,而係個性特別強,服從性又低,所以咁難教。

呢樣野我都好認同,因為就算食神明白坐呢個指令,但係佢如果興奮,你係好難叫得佢坐,除非你拎一大碌棍去恐嚇佢,或者用食物去引誘佢。

有時你用棍去叫佢坐,佢會成隻攤響地,典來典去咁嗲你,真係吹漲。用食物,佢食完又試唔聽話。

我又發現,佢除左食物,最喜歡就係摸頭,扯耳仔,同埋敲鼻樑。於是,我每次上天台,就咁樣用呢三招服侍食神。等到佢滿足左,我就叫佢坐。條友原來受軟唔受硬,你招呼得佢條氣順,佢就或者聽你支笛,機會係一半一半。又於是,當佢聽話坐低,我就又再摸頭扯耳敲鼻樑,叫一聲乖狗。如果唔聽,我就走人。

經過不知幾多次之後,現在我上到去,佢就伸個頭出來等我服侍佢,然後唔駛我叫,佢都自動坐低,咁我都摸佢兩野,讚佢一句。

食神係講義氣既,唔會輸打贏要。真係好過大多數人類。

沒有留言:

張貼留言