2017年8月15日 星期二

鐵三角

做左半世紀人有多,歸納出一套人格分類法。好簡單,只睇三個原素:蠢、癲、運。

舉例:特朗普和肥仔恩都係同一類,唔蠢,癲,仲有運。

剛剛肥豬腿釘上釘書釘的肥佬,就又蠢又癲又冇運。如果醒少少,你當日在砵蘭街出現過,就話被人在灣仔修頓隔籬個公廁擄走,人地翻查閉路電視,由金鐘搵到銅鑼灣,搵極搵你唔到,吹得漲咩?

呢三個原素,又有相互關連。譬如:蠢人多數行事癲癲地,但係蠢和癲係兩回事。好似我見過一個女人,一次在旺角,一次在油麻地,拎住大聲公不停咁鬧,都唔知佢鬧乜?好明顯,佢符合癲的標準,但係佢唔蠢喎,用大聲公,多人聽到又唔會喉嚨痛丫嘛。

而有運的人,唔理蠢唔蠢,就多數會發癲。蠢就癲多D。

最慘就係唔蠢唔癲又冇運的人,你好大機會遇上蠢人、癲人,又蠢又癲的人,真係有排頭痕。

沒有留言:

張貼留言