2017年8月24日 星期四

仆街天鴿

呢個風真係來得快去得快。前天,熱到破紀錄,甚至入黑之後,仍然熱到死,要開冷氣訓。

到五點醒來,仍然三號波。落去早茶,仆街,鬼影都冇隻。喂!上次八號波都有開喎。惶惶然走向路德圍,一路都只得間麵包舖有開,連平時通宵的狗仔粉都拉左閘,粥舖又冇開,乜X都冇開,唯有去老麥啦,食完早餐返屋企訓過。

過左冇耐,已經八號波,又一陣,九號,好快,咁就十號。風勢都頗大,要關好全部窗。忽然聽到巨響,望出窗,見到對面街的大樹被風吹彎,再彎D,再彎D,咁就斷左,攔住條馬路添。再睇真D,隔籬棵木棉已經斷左,剩返半碌,原本六層樓高,現在只到三樓。

呢個時候,開始有D驚,會唔會飛砂走石,吹D乜野過來,砸爛我隻窗,咁我咪仆街?更仆街係,我屋企乜貨都冇,今日食乜呀?因為我五點幾已經食完早餐,未到十點就覺肚餓,唯有煮幾粒米,整磚腐乳頂住下啦。

掛念食神在天台,走上去睇睇。條友都唔知攪乜,成身好似撈過泥咁,又濕又污糟。見到我就不停悲鳴,仲想爬過欄撲出來。只好敲下佢個頭,安慰下佢。敲左好耐,先至叫安定D,肯擘開口伸條脷出來,似返平時個狗樣。

到兩點左右,風勢減弱。已經轉了八號。走出街睇下乜環境。遇到爛口傑上班途中。午飯得磚腐乳送飯,又覺肚餓。見大家樂排隊排到出門口,只好又去老麥。自助點完餐,又係等到仆街,見好多人大袋大袋外賣咁買,唉!梗係屋企攻打四方城,買個包一邊食一邊打啦。

想起本來呢個時候我都應該打緊牌,真係惆悵,黯然返歸罷。

沒有留言:

張貼留言