2017年8月26日 星期六

又打風

昨日呀,見頭髮凌亂似乞兒,就走去飛個髮。飛髮舖有幾個客,粗口橫飛,又吊長毛,又吊肥仔健。飛完個髮走都走唔切。覺得自己身心都被污染,於是走去又一城呢D高貴地方,沾返D貴氣。咁我唔係話睇唔起人,我自己都係七十蚊飛個髮,同樣係粗口爛舌,貴極有限啦,不過都唔想低到咁低丫。

又一城就唔同囉,起碼呢個場D空調一流,唔係一味死凍,係涼得來流通丫嘛。

行過一檔賣揚聲器的,見佢外形成個波咁,就站定睇下。條SALES佬走過來搭訕,話呢隻喇叭不但止咳化痰好,仲乜乜物物,講一大餐,我問佢幾錢,佢話:二萬五!我挑!二萬五銀一對喇叭,點聽得架?掉頭就走。

跟住走入蘋果店,嘩,有個女售貨員,笑得好甜美。我最鐘意睇人玩IPAD,因為我自己部IPAD除左睇書,就乜都唔識用,想睇下人地有乜野玩。但係個個都係打機,幾千銀用來打機,奢侈D喎。

又見到兩父女行過,一睇個女,就知係放洋留學,暑假返來玩啦。想起幾十年前往事。中學時在學校泳池做救生員,暑假時,有個學生來游水,係由家姐陪同,家姐就唔落水,不過著吊帶背心和短褲十分養眼。當時有個全職救生員,叫石仔,就走去結識人地,原來係在美國讀書,放暑假返來香港。打得幾次電話畀人,結果人地老母出面,話你條癩蝦毛唔好再打來,否則去學校投訴,等你冇得撈。笑到我地一班人肚痛。

當年就係咁開心。轉頭睇返而家,冇幾多人係開心的。我睇最令人反感,就係太多人將人性的陰暗面,毫無掩飾咁暴露人前。或者佢地以為自己好聰明,做得好高招,冇人睇得出,又或者佢地覺得根本唔需要掩飾,搵到著數就得。有D就以為自己搵緊著數,其實就蠢到死老母,被人玩到殘。

都係咁話,自求多福啦。又試一號波啦,有左早幾日的經驗,今次都係早D搵定腳開檯罷啦。

沒有留言:

張貼留言