2017年8月27日 星期日

風繼續吹

昨晚睇電視睇到半夜三點,睇左郭富城唔知幾時拍的殺人犯。呢D戲要我畀錢入戲院睇,一定要等第二世,唔駛錢有得睇就用來消耗下時間啦。夜左訓,今朝七點才醒,係被狂風狂雨聲吵醒。好唔想起身,但係又訓唔返。

過去幾年打風,真係靜如深海,半滴風都冇,我諗住屏風樓已經包陷左呢個城市,何況近來海皮又起多幾座添,偏偏與我估計有出入,呢兩次打風都咁強勁。

打風最可怕係突然而來的一陣強風,會將雜物吹起,把窗戶吹開,嚇你一嚇。
===
冇得出街,個人血凝氣滯,就快死得。呢個星期,一係打風,一係熱到甩肺,所以都冇行山,連晨運都少。我自己知自己事,唔會好似D人咁勇,大熱天都走去行雞公嶺,行到中暑搵邊個可憐呢?

另方面,點解D人唔會學精呢?見到咁多人中暑,都要做烈士?

即係好似睇報紙咁,我不單唔會買報紙,上網睇,新聞版一擊,拉個清單出來,睇下標題,冇政府派錢的新聞,就會跳去睇副刊,亦都只係睇兩篇寫得比較好的專欄,咁就收工。

你明知寫來寫去,都係煽動市民,就唔好浪費眼神啦。

===
我識條友,佢好明顯就未明呢個道理,又要睇又要鬧。好似電視劇咁,佢會鬧套套都係田蕊妮,又會鬧肥佬晶搵阿叻來扮小子角色。。。

你學下我啦,唔睇咪得囉。呢個田蕊妮,我相信佢係自己出錢畀返公司來買角色,唔係點會年頭到年尾都係佢丫。仲有個胡定欣,仲殘過鮑姐,咁既劇集,點睇呀?

條友又話荷里活電影套套都相同模式,劇情睇呢一分鐘就知下分鐘係點。有次睇左十幾分鐘就訓著左,佢老婆推醒佢,話咁嘈都訓得著,以為有遺產分添。

===
如果經過上次打風要食腐乳,都唔汲取教訓,我仲邊有資格鬧人蠢到死老母呢?所以昨日見掛一號波,就拿拿聲去買左個椰菜,兩罐沙甸魚和兩包急凍蒸餃,今日三餐都可以自足勒。

沒有留言:

張貼留言