2017年8月7日 星期一

好嬲定好笑

今朝早茶後,出海皮晨運,行得兩步又急,於是折返。行到某大廈門口,遇到個相識,吹左一陣。佢在此大廈做保安,同我講上星期五發生左單野。有收數佬上某單位攪破壞,保安經過見佢鑽門鎖,查問之下,收數佬扮係租戶命令。保安打返控制室,控制室打去問業主,結果由得佢鑽。結果就梗係業主和租客都詐形,而家睇下隻鑊最後邊個孭,企起身走人。

呢件事,好嬲定好笑呢?好簡單,唔關你事,咪好笑、關你事、就好嬲!業主交左管理費,你保安睇見都冇阻止,梗係嬲啦。我一個路人甲,聽到咁戇居一件事,梗係笑到標屎啦。

我成日覺得做人真係好大整蠱。人,一定要和其他人接觸,長期孤單一人,不止口臭,仲會發神經。但係與人接觸,又有好多麻煩,返工遇著蠢人、懶人、衰人、癲人,你真係唔想做人。好似呢單野咁,班蠢同事可能連累你留底,年尾花紅又少一截。

講到最後,又係果句:睇你好唔好彩啦。

沒有留言:

張貼留言