2017年9月7日 星期四

KOL

最近有個廣告,口號係:有LIKE有飯開。又真係好正確。阿爺拍左兩輯飲食節目,大受歡迎,而家索性開私房菜,二千蚊一位,佢就食大茶飯啦今勻。

不過有LIKE係咪就係好野,未必囉。而家有好多人全職拍片擺YOUTUBE,多數係吃喝玩樂,亦有D係拍家中寵物,無厘頭都有幾十萬人訂閱,是但一段片都有十萬八萬人睇,咁計數,真係唔駛做,日夜拍片就得。

當然有好多好野,例如QUEEN一首歌就有成七億次點播,可能分到既錢夠我食過世。但係有D片就呃錢兼浪費時間。好似香港有兩姊妹四圍去食野,拍片上載,有D一望見D食物就知唔新鮮,食完怕且會肚痛,佢地都話好味,好抵食。咁又難怪,佢地既成本,除了相機、時間、和評述所需的口水,最大就係埋單找數,如果試完呢間唔出得片,咁就蝕入肉,但又冇理由出段片去介紹D渣野,咁咪屎都話抵食囉。

所以講到尾,都係自己分析啦。講返阿爺私房菜,佢煮野一定比蘇絲黃高九班啦,但係做職業廚房係好講體力,佢成七張野,有冇可能仲自己落手去做呢?如果為左同佢合照來呃LIKE,好似貴左D。

3 則留言:

  1. 煮成點就唔知,但佢成棚煙屎牙,睇見已經唔開胃。我覺得做飲食節目,起碼俾人睇到個主持人外表企企理理先至得嘅。

    回覆刪除
    回覆
    1. 我之前點心班個阿蛇都係咁講,佢話以前有學生幫佢搭路搵出版社出書,但係對方話佢又冇名氣,最弊賣相差,我聽完之後立即轉開話題,免得觸動佢傷心事。

      刪除
    2. 後生經驗少, 好難煮得好食. 老既經驗多又一定唔靚.
      阿爺係煮開比屋企人, 唔會好污糟既.

      刪除