2017年9月16日 星期六

後生可畏正POKEGUIDE

早幾日開檯,成班老野講現在的後生仔女。有人提到現在呢班大學生,廿歲左右,即係香港回歸前後出生啦,呢廿年發生左乜事,令到佢地會有攪獨立的思想呢?有個從事新聞工作的同學話:挑!佢地係蘋果養大丫嘛。

蘋果就好似冇乜鼓吹港獨的文章,但係佢地真係塑造左好多人的思考模式。佢地凡事都係用幾條方程式,將件事套入去,必定係咁既模式去睇事情,有左咁既思維,有港獨思想都唔出奇。

好似但凡有幾十年老舖要結業,就一定話係地產霸權扼殺小店生存空間。好似西營盤有間餐廳,最近報紙話佢不敵貴租,要另覓店舖。其實我四十年前讀書時就幫襯呢間野,當時四個半銀錢一個午餐,食得好開心。十年前再去,已經係四十幾蚊一餐,但係食完之後,發覺仲差過大乜鑊,佈置又陳舊,一陣霉味,我就話過永不錄用。班舊同學去完都話好失望,唔會再幫襯。真係不知幾望佢一早執左去算數。報紙講野,信一成都死。

另一條方程式,就係大衛與巨人,巨人一定係仆街,恰細路。最近就有單野,一間新創立的科技公司,向港鐵賣過橋,最後港鐵自己開發左個APP,功能類似公司仔所提供的。網上有人向公司仔報料,話港鐵抄佢橋。蘋果梗係插一手,報導下啦。

我有上呢間公司的FB睇過,嘿!班POKEGUIDE講野真係當人傻仔,佢話港鐵你既然知道有其他公司已經有現成科技產品,點解要自己花錢從頭開發呢?咁咪對票價有上調壓力,損害公眾利益?

同唔同你做生意,可以好多原因,單單話你樣衰就可以趕你走。如果你賣底褲,人地睇完唔買,你係咪鬧人,你橫掂都著底褲,做乜唔幫我買?一千幾百萬開發費,比起港鐵咁大間公司咁多開支,真係零頭都不如,對票價有幾大壓力呀?利益受損的,只係你做唔成生意,嘥左口水啫。

咁都有兩面睇,一係班POKEGUIDE想博宣傳抽下水啫;一係佢真係洗左腦,扮受害者,亂咁作個道理就想博懵。呢D都係蘋果一貫作風,所以話佢教壞左新一代,都係錯不了。

2 則留言:

  1. 所謂既港獨, 都係夜嗎嗎, 戴晒口罩先夠膽貼, 呢D邊會有作為? 有種梗係上中南海貼啦.
    冇人生經驗既港孩, 到返工就會知社會上有好多潛規則, 我見唔少黃絲因為錢, 因為份工, 立即轉色.

    回覆刪除
    回覆
    1. 全部都係為對抗而對抗,查實全部都係無用腦去想過。

      刪除