週記

八月份卅一日，只休息了兩日，去到月尾已經身心疲倦。踏入九月，望住星期天，繼續撐下去。

四號星期四，發生事故，有三個南亞仔上了天台嬉戲，日更阿頭報９９９，攪到消防和警察都到場。本來唔關我事，我只係頂更、外援，但係自閉仔放假，巴基之友帶了​消防上去，警察才到，唯有我頂上，帶班阿蛇上天台。

我上到去時，消防已經叫返班南亞仔下來。警察到來，就叫班友列隊問話。三條友真係鳩毛都未出齊，仍然肆無忌殫，一個手插褲袋扮型仔，阿蛇喝佢，你好型呀？我帶你返差館型飽佢。另一個全程印印腳嬉皮笑臉。

消防見警隊接手，佢地就拉隊走。個消防阿頭就捉住我，噴到我一面屁。態度惡劣，只差未講粗口。我心諗，你睇到我著乜野制服，巴基之友著乜野制服，點解一直你唔噴巴基之友，走來噴我？種族岐視？我知道條友都係搵我來發洩，如果我駁嘴，佢就變本加厲，插天光。只好硬食。

嘿！消防走左，輪到警察，個三柴來講耶穌。佢就好態度得多，但係長氣過主日學。我都向佢利益申報，我只係頂更，唔係呢個盤既員工，雖然係咁，你同我講既野，我會盡我責任，向阿頭呈報。但係條友講到停唔到口。另一個阿蛇同MADAM，仲要抄我身份證，問地址電話。。。大佬，關我撚事咩？又要硬食。

和警員及南亞仔落樓之時，其中一個南亞仔係咁啤住我。我受了一肚子氣，就指住佢鬧，你啤乜野呀？！條友兩眼通紅，仍然啤住我。𨋢到，人太多，一批警員押班南亞仔入𨋢，個眼超超仆街，對警員啤啤貢，條差佬喝佢：做咩呀！想襲警呀？！我同三柴講，佢啤我係咪想點我相，想伏鳩我？個MADAM話，佢伏你，你咪報警囉。我吊你啦，報得警來我都化灰啦。

相關人仕走後，我向日更阿頭投訴，被消防凶鳩我。佢就詐打電話向上頭匯報。到夜更阿頭上班，我同佢講我的遭遇，有乜理由噴我唔噴巴基之友？佢笑騎騎扮同情。之後我捉住佢要睇返CCTV，並要求儲存起，以供下次呢三條友再來，就搵返警察，提供證據，佢地係慣犯，捉佢地返差館，起碼要父母來保釋。阿頭話你都講得岩。。。係要有個紀錄。。。

我已經覺得，第一，好委屈。第二，呢班同工靠唔住。

＝＝＝

當晚，我就上淘寶，買左支鋁質電筒。以後有乜依郁，有野揸手。我仲再返睇杜琪峰的PTU，學任達華揸電筒。佢係反手揸，手與眼齊，即係燈胆向前，電筒尾向後。手已經舉高，即係隨時可以一野扑佢老母！以我身高，可以一下就打爆未成年的南亞仔的天靈蓋。如果係成年人，咁就煩，我就要打佢頸側，因為有條叫做迷走神經，可以打到佢西迷迷。

你可知我幾咁驚恐。

＝＝＝

第二日星期五上班，我再同日更阿頭提返件事，問佢有否存起CCTV片段。條友竟然話唔駛，個系統有兩、三個月紀錄。。。我真係心死。以後唔會做多過本份半點。有差佬、消防上門，你地自己去攪。至多唔撈。

＝＝＝

星期六上班，我訓到不知人間何世，翌日朝早六點四十分才醒。

＝＝＝

星期日，休息日。訓醒有馬跑，馬季開鑼，點都要參與，結果輸左二十大元。馬仔都恰我。入夜掛起八號波，理柒佢，一路眠。

＝＝＝

星期一，依然八號，冇得去行山。去唐記買隻糯米雞做早餐。吊佢老母，一定有問題，食完個肚唔舒服。連隻雞都恰我。成日都唔舒服，到傍晚又屙又嘔。

＝＝＝

我開頭真係嬲，又覺委屈。但係想了一下，我呢一生，幾時唔係咁？次次都係盡責，但係學曾鈺成話頭，最後都係有辱無榮。

咁～～～之後咪乜撚都唔做囉！