買左三隻螺，過了一日，少了一隻。但今天出現了，不過已經死翹翹。魚呢，昨天死了一條，應該仲有十一條。數來數去，得九條。咁都要生要見魚，死要見屍丫。乜都冇。數呀數，數呀數，哦！有條自閉仔，匿得好密。咁都係十條，尚缺一條。
唔通真係外星人第一日擄走隻螺，第二日還返隻死螺，擄走條魚？
另外，就係班仆街米奇，原來佢地係食植物的根的。一株黃金葛，之前養到長了三條長根，一晚佢地就食撚晒。唉！又係我錯，冇研究清楚魚類習性。連早前枯木逢春的水草，都趙到七個一皮。現在要再計劃下，點樣部署了。
2026年11月13日星期五
還有七天
還有七天才放假。返埋１９號，就連續開工３８天。跟住休漁期７天。咁既生活，唉！無語。
昨日通勝話宜納畜，於是去買左廿蚊三隻螺，和廿蚊米奇。一、二、三倒晒落去，要考驗下個缸水養成點。
今朝返來一睇，唉！死左一條，一隻螺在吸食屍體。數下數下，魚數就對，但係螺呢？搵下搵下，有一隻逃獄，跌在缸邊、掉返落水，好在未死得。但係仲有一隻呢？搵極搵唔到。被外星人擄走了？
米奇好似係會啄食水草，之前劫後餘生的水草，被欺凌到剩返一半。但黃金葛和虎尾蘭的根又好似冇事喎。
其實我目標係建造一個生態平衡的魚缸，唔駛開過濾，植物的根會吸收水中的廢物，只係稍稍餵飼魚魚，就可以持久運作。
此外，最好就放正個風水旺位，從此買乜中乜，窮下中農大翻身啦！
2026年11月12日星期四
我冇講錯丫！要帶眼識人！
最近有幾單新聞都好爆！講來講去，都係當事人冇帶眼識人。
第一個皮褸黃。睇網上資料，原來佢和我同年。大佬，你都一把年紀，有女黐埋身，就以為自己魅力非凡，咁有錢，屋企冇鏡咩？就算係賀爾蒙紊亂，都睇清楚係乜人丫。搵個用純粹用錢攪得掂的咪算囉。
第二單係瑜珈導師被捅四十刀，成個篩咁。被告就話自己三萬銀月薪，為滿足條女，債台高築，被追債追到想自殺。死者朋友就話，被告約死者去酒店，話要送個包包和絲巾過佢。兩個都唔帶眼識人。死者你要去收兵，都搵個真係有，而且蠢得徹底，唔會反檯的丫。阿被告你要搵女，都搵個自己承受得起，唔好咁大咬的啦。。。
第三單梗係青紅蘿蔔煲人頭啦。最新消息話個前夫因為被前妻辱罵，歇斯底里地殺鳩左佢。你不如話，你地住開嘉多利山，嫌佢空氣唔好，所以租大尾篤龍尾村丫笨。我話既！一個二個都唔係好人，而且仲唔帶眼識人。
2026年11月9日星期一
之唔係又係帶眼識人囉
九十年代，股市興旺。
我的工作範圍，就係一套管理股票登記系統，轉讓呀，各樣各樣的。IPO公司上市，如果超額認購，就要抽簽，程式就係我寫的。
當時搵工，大家都睇一份MI報。MI報要上市集資市，人人睇好。以為抽到股票就立即大賺。
不幸地，被我發現了，我的老細，改了我的程式，讓佢的認購表格，經過呢個程式就必中。當時老細正和另一個同事起了矛盾，弄得不愉快。而我們一班後生仔，揸住呢單野，收集了證據。
碰巧是聖誕節，我就將原程式碼，再加一張寫了MERRY CHRISTMAS的字條，趁老細不在，就用公文袋裝好放到老細桌上。
話都冇咁快，老細就有動作。同佢有矛盾的同事，碰巧請了病假，佢就同上頭講，佢明查暗訪，根本冇呢個醫生，係呃病假。要做死呢個同事的誠信。我查過電腦紀錄，條友連佢親信都唔放過，全部人員在電腦上的紀錄都查過一遍，想搵出係邊個隊佢。
我一貫鵪𪂹，老細估唔到係我。我就越級向老老細舉報，老老細當然唔想上身，再上奏天庭。一番折騰，搵來集團保安大佬，條友明明係鬼佬，但廣府話講得純正。佢個細佬大鳩我，話我現在攪到人人都知，我話我想全世界都知。
結果老細知道攪黃左，監都有得坐。只好認罪，求得個淨身出戶。乜鬼長年服務金都唔要。
最後老老細搵我傾，話咁咁咁咁，你滿唔滿意？仲有冇後續行動？即係想問我仲要唔要報警。我想佢都好大鑊，就算撚數。
當時我已經遞左辭職信，當然亦冇人會挽留。
當然啦，留低，都唔會有好日子過。
事情發展中，我都有和屋企人講過。知道有風險，隨時被人屈成犯人，就好撚大鑊。
但係，到後來知道洗清嫌疑，屋企人就掉轉方向，話我處事唔成熟。亂鳩咁辭職，完全冇責任心，乜都係我錯。有乜事就提返出來吊鳩我。
所以呢～～～帶眼識人，包括你屋企人。
仲係帶眼識人
講人地容易，講自己就～～～
老實講，我就真係唔識得帶眼識人。一次又一次，重覆又重覆，都被熟人坑害。
我以前認為，大家傾得埋，圍威喂，一齊去砌，一齊去搵機會，大家都讀了一輩子書，有技術，有點子，一齊去闖個未來。
其實九十年代，我就想了一個類似現在price.com.hk openrice.com之類的東西，專做電器的格價專家之類的網站。搵埋三個老同學，兩個管技術，兩個管營銷，拍住上，開創一番事業。
但係你想，可以。人地點想，你管不了。兩個SALES佬，只想吃白食，你地做晒，佢地割韭菜。講就天花龍鳳，要做野就變身隱形俠。最後自不然係冇成事。
最笨實的是，之後我笨到再被呢兩個SALES佬，各跣一鑊，攤攤腰之後才講一句：我吊你都仲得！咁先斷絕來往。
＝＝＝
到了千禧年，HOTMAIL大盛，手機還未有智能，但已有基本上網功能，有樣叫WML的東西，現在當然入左博物館。當時我攪了一壇手機電郵系統，成功可以用手機發和收文字電郵。但係我只曉得埋頭苦幹，要推廣，點做呢？
我先後問了四個人。
一個老實回答，呢方面佢冇認識，幫不了我。呢個朋友，現在仍是好朋友，經常見面。
其餘三個，全部狗UP當秘笈。簡而言之，就係太監陳之流，見不得你好，潑盡冷水。
事實係隔了兩年，和記才推出同類的電郵系統。
＝＝＝
上面講的三個人，有一個係親屬。
咁當然要怪都係怪自己，你患得患失，人地一潑冷水，你就縮，你材料有限啦。認命啦！
＝＝＝
最大問題係：呢三條仆街，我都唔係即時吊佢老母，要過很長時間先斷絕來往。呢個就係帶眼識人的要點。你睇唔到重點，咁係你的問題。
又係帶眼識人
最近醒起，我個扑係聯上了谷歌的廣告，應該係收錢的一個途徑，點解咁耐冇錢收呢？？？查返原委，原來係某年谷歌改了合作條款，當時唔知乜野原因，冇跟進，咁就冇再收錢了。現在人窮思變，開通返呢個渠道，睇下有冇錢途。
咁第一樣野，就係睇下我寫乜最多人睇啦！就最近的博文，原來一篇帶眼識人最受歡迎。咁就講我見過，有關帶眼識人的故事啦。
就我的記憶，我只對一個人講過呢句帶眼識人，就係對大口娟講。
當時成日蒲餐廳酒吧，在吧檯坐得久，見了不少人生百態，亦和一班餐廳職員變得熟落。
大口娟長期做吧頭，份人傻更更，大家都嘻嘻哈哈。我成日笑佢個口大，佢就話我把口衰到冇人有。成班餐廳職員，都係廿歲出頭，有幾個仲係中學畢業後第一份工。好自然，好色慕少艾，好多就在職場中談起戀愛。侍應和廚房佬，廚房和洗廁所，阿貓同阿狗。。。。
大口娟亦和一個佢話貌似方力申的同事，以國內用語，處起對象，仲同居起來。但係不久之後，呢個男方就轉工，再不久就聽到女方問人借錢。皆因男方大駛夾爛賭，賭波欠下債項，女方問家人借過錢，幫過一次，但仍然依然故我，不得已都要斬纜。轉埋電話去表示決絕。
紫釵記中黃衫客有句金句：暖酒看炎涼，冷眼參風月。一班人坐在吧頭，有意無意都會觀察到其他客人。其中有一檯客，一男一女，帶一個小童。兩個大人經常飲到醉勳勳，個細路就無皇管，四圍走。後來得知，女方係已婚之人，但老公唔係呢個男子。咁就～～～
呢個男子，你成日同人地老婆飲到醉，不知有何居心。淨係帶埋人地個仔去飲酒，已經要打八十大板。可能佢平時埋單，貼士好闊綽，一班女侍應都話呢個係筍盤。我地一班老派人，當然唔認同。
後來另一女侍應和男友本來都一同夾份買樓同居，不知何故而鬧翻，呢個所謂筍盤男就乘虛而入。但係不久後又始亂終棄，改向大口娟埋手。我地一班塘邊鶴，都不恥其行為。
大口娟可能久旱以為逢甘露，十分受落。我地都勸佢，唔好盲目追求愛情呀。。。我就係呢個時候講：帶眼識人呀！
後來某些原因，我不再去呢間餐廳，事情如何不得而知。某日在街上遇上大口娟，大家CATCH UP，佢話一班女同事，一個二個都結婚生仔。再過一段日子，佢都發訊息話結婚，邀請一班熟客去參加婚宴。我就唔知男方係乜水，會唔會係呢個呢？不過我都托詞冇去。理鳩佢啦。。。
個故事係咪冇頭冇尾呢？大佬！擺到明係搵水啦！遲下我研究埋YT，B站頻道，睇下有冇得拍下片搵錢。大家多多支持，幫忙點下廣告。感激感激。
訂閱：
文章 (Atom)