網上見到有一隻結他出售，十幾個星期都未賣出。睇真D，係老牌日本品牌，仲係日本製造。只售港幣八百元。
君不見，許多名牌結他，以往為減省成本，都在台灣，印尼，韓國造。到近來，名牌貨，賣幾千元，都係大陸造。
日本造的，八百元？
我唔係話台灣，印尼，韓國唔好，我有隻台灣造的YAMAHA，成五十年歷史，都非常強健。但係，日本仔就係咁，本土造的就係好D。
八百蚊，我睇照片，冇乜問題，點解賣咁平？
睇個賣家，係個年輕女子。呢隻結他，係八十年代出品，點都唔係佢原物主，唔知佢從何得到。而且個牌子，幾十年前好出名，但係可能個代理因乜乜物物原因，唔再代理。所以幾十年冇人聽過。係我呢個老野都仲記得。
除非實物係甩皮甩骨或者有內傷，否則八百蚊真係抵到爛。
但係，我年頭買了一個四百元的結他。咁快又買多個？咁我屋企咪變通利琴行？
我係咪應該買支新的，賣支舊的呢？賣野好撚煩喎。
做人有追求，有盼望，係好的。但係，我舊的都未掌握好，就走去搵新的。係咪錯重點呢？
＝＝＝
咁啦～～～世界盃如火如荼，我度條六穿一，中左就買啦！
早前講到左腳莫名地大出血。當時立即用茶樹油消毒，傷口好了許多。
隔一日，剪腳甲時，又唔小心，又攪到一地血。心諗，合該有事。提醒自己，萬事小心。用菜刀，過馬路，我都提心吊膽。
又隔一日，夜晚偷雞合下眼，點知發夢，有隻老鼠向我衝過來，驚到從椅上跌落地，混亂中，左腳個傷口，又綻破了。
不由你不服，打算周到，都難避一劫。
另外，本星期初，開始流鼻水。有轉嚴重的趨勢。立即煲冬瓜水，希望消一消暑氣。但係冇效，心諗，呢個係風熱感冒，應該食銀翹，立刻去買。點知萬寧竟然冇得賣。
第二日醒起，疫情期間，收過蓮花清瘟膠囊，應該都合用。點知食左兩日都冇改善，就連其他幸福傷風素，化痰素都食埋，都係咳到仆街。
最後都係去買銀翹。食左兩日，終於有好轉。
有時唔到你唔信邪，係有事就算你點小心，都避不了。好啦！以後乜都唔好想咁多，放心隊啤抽煙啦！
醒來之時，發覺坐在椅上。桌上電腦已經進入休眠。
天色昏暗，望下檯面的時鐘，六點。搖下滑鼠，電腦屏幕亮起，係２２號。突然一陣恐懼來襲。仆街！今日唔係休息咩？２２號六點，先剛醒來，今日返工咪遲到囉？！！！
咪住！停一停！定過神來，再想一想。
睇清楚，吊！原來係早上六點。。。仲有成日玩，先至返工。
先研究下自己有冇問題，會唔會又有莫名奇妙的傷口。會唔會少左個腎。。。冇事。點解會咁？想下想下。。。係勒。。。昨晚係飲左好多啤酒，所以先會坐響度訓著。有床都唔訓，真係賤命。
咁點解飲咁多酒？無錯勒，因為太開心勒。
回到一日前，星期日，２１號早上，收工返屋企，就上網搵下當日賽事資料。睇左一輪，腦中響起：沉默不是懦弱。。。張明敏的我是中國人。第十場的人和家興，就係張生有份的。評分已經到有利階段，呢匹老馬，次次都贏到冇人信，希斯留住唔退役，唔係白養的。
在一班老同學的群組中分享了我的見解，就真金白銀落注。長話短說，我買了一注五串廿六的位置和位置Q混合過關，＄１０４，另外就一注三串一位置，＄２０。
結果五串廿六就中了頭兩關，諗住可以破紀錄，過足五關，但係第三、四關都仆了街。三串一位置就頭兩關都過，變成一切都睇第十場，睇啊張生勒。
一開閘呀，人和家興順利放頭，然後控制步速，拉慢來回氣。入到直路，仍然有兩腳，完全唔失禮。到最後，睇住跨境寶馬追上來出左頭，咁我就兩張飛都收錢錢啦。點知隻衰馬臨尾腳軟，被人過晒，只得第四。五串廿六就只收返頭兩關廿蚊，好在人和家興就仍保第二，三串一位置就過晒。
等派彩打出，嘩！成＄１１９披屎，成世人第一次收咁冷披屎。睇下條過關，買左廿蚊，收返六百蚊！
哇哈哈～～～
就係咁，我就成晚笑到合唔埋嘴，一路飲酒慶祝，飲到在椅上訓著。。。
星期日，休息日。放左工就買啤酒隊一隊。訓醒就跑下馬；輸一場，贏一場，都係要輸個半銀錢。夜晚好早就眠。
一覺醒來，已經六點半。拿拿聲拎衫去自助洗衣。洗落衫就趁呢半小時空檔去飲早茶。飲早茶係我其中一個可以放鬆自己，療癒自己的方法。攪一大餐，洗好乾好衫，就上引水道。又係放鬆、療癒。
只係天氣實在熱。只係過左小滿，已經熱到仆街。都唔行得好耐，就落老圍，去玄圓學院行一轉。本想去參拜呂祖，因為剛過呂祖誕，點知做緊法事，不方便入去，在外圍拜兩拜就算。
落到市區，走去裕華保健坊買香砂六君丸，因為最近脾虛濕重。有人做呢類成藥，真係做福人群，如果要自己執藥，煲藥，好可能我都懶得去做。
星期一晚，就要去個新場工作。其實都和以前係同一集團、同工又係巴鐵，傾落原來佢都識之前個場的巴基之友、和個仆街阿頭。
一晚下來，坐到屎忽痛。慢慢來啦，一定會習慣。
吊你老母死仆街，剩返自閉仔同巴基之友，你個場有乜事，聽仆街啦！
