疲倦

昨晚開工後不久，就閤著了眼。巴基之勝見到，就叫我轉位，早D休息。鎖你鎖你，不過都老實不客氣，就走去睡。自從上月十二日休息過，就一直踩到現在，即係廿七天連續了，唔死都算硬淨。

亦都有個可能，就係日間我煲了個沙蔘玉竹蓮子百合無花果湯，潤肺抗燥，因此特別好訓。

＝＝＝

過年前買了本通勝，現在到年尾了，發覺冇乜點用過，唔得咁浪費。於是我就查下那一天宜理髮，就依呢個黃曆來行事。得出上星期六宜理髮，一早收工回家，洗個頭就去飛髮。

因為時間早，冇客，一去到就飛得。飛髮佬突然問我：人老左變乜？

我呆一呆，你都問得奇怪，答：人老左咪變老人囉。男人就變老男人，女人就變老女人。

我答得合情合理丫，點知佢話唔係。

飛：我意思係人老左應該點做。

我：吊，你真係老到濛鳩查查，講清楚丫嘛。

飛：人老左，最緊要兩公婆唔好咁恩愛。

我：唔～～～　（都唔知你講乜鳩）

飛：兩個太好感情，一個死左，留低一個老野，好慘情架，個心真係會痛架～～～

我今年八月才發現呢個架步，今次係第三次幫襯，有兩次都聽佢提起個死鬼老婆去世，好似都係一年內的事。原來呢條友係癡心情長劍，呢樣野，我幫你唔到勒。講下講下，佢又講歷史，話響呢處開左舖四十年。我大返佢，我響呢頭前後住左成五十幾年啦！你呢個舖位，以前係一個小型製衣廠，樓下係茶居。我七幾年已經搬左入來啦。咁佢先收聲，話佢七幾年先落香港。

劍飛哥雖然講野唔清唔楚，不過剪頭髮功夫絕不含糊，下次都會繼續幫襯。

＝＝＝

通勝又話，星期四宜納畜，我估都適用於買水族魚類卦～～～都差不多日子了，一於到時去買袋最平的孔雀魚來開缸啦。

＝＝＝

星期日一早，準備煲湯之餘，又準備賽馬。睇落好似何傑青手馬好勁，阿神仙蔡又似博殺，篤篤篤篤，就買左條五串廿六位置Q單棍過關。買完馬，煲落湯就走去瞓。醒來發覺一地水。原來個濾水器個出水口被生物磁環塞住了，如果再遲D起身，成缸抽乾添。馬上熄機，拖地。做死阿叔了。

幸好個湯都煲完，好清甜好潤。一個人就飲完一煲，卅蚊豬𦟌肉全部落肚，晚飯都唔駛食咯。

睇馬仔，哇哈哈！頭關順利過關。一條五串廿六，就變成四串十五了。之後每中一關都有錢收，中得愈多，收得愈甘！

第二關，仆街丫，中得一隻，咁就變成一條三串七。

第三關，哇！爆大冷，我再貪心都唔敢咁樣買。變成一條二串三。

第四、五關各中一隻，一場好夢，化成殘夢，全日輸一百元整。

作為一個資深馬迷，要有輸不死精神。下次再同佢死過。

＝＝＝

今朝收工，打算回家就去自助洗衣。點知回程途中，內急起來。昨晚就係飲湯當飯食，可能無花果有潤腸功效呢～～～

幸好及時趕到，不至闖禍。

昨日買的一堆藥材，打算十一月再煲兩次湯，潤完個肺，十二月就煲壯腰補腎的湯水了。

老男人要照顧好身體，要活得自在，會行會走，食得屙得訓得！

身弱

上次星期日贏完馬仔，就鬆毛鬆翼，話自己轉運。結果星期一晚就出事，部手機無端端神左，BOOT唔起。上網搵左好多原因和解決方法，但都不適用。折騰了廿四小時，期間想到很多問題。淘寶下了單，就快到貨，冇手機點收貨呢？冇手機，完全和世界斷絕，朋友會唔會搵我唔到，又搵上門睇下我係咪猝死家中呢？如果真係救唔返，去邊處搵錢買過部手機呢？星期三夜馬，冇得投注。。。世界末日啦！

常言道，事情未必好嚴重，但係你的想法，思路，想得太多。。。就可以好嚴重。　呢個真係珍珠都冇咁真。果種折磨，真係攞泥賤。

星期二晚，寧為玉碎，一於剷佢老母！我知道要從新安裝所有APPS，真係好撚煩，但係既然冇辦法解決，最壞情況，都係舊機報銷，花錢買過部。咁老虎加隻蟹，博一博啦。就將部機重置、推倒重來。

嘿！又BOOT得起喎！真係唔知到底係乜問題。於是乎，由八點，一路重新安裝，攪到十二點才大致回復。之後隨時想起有乜，就再安裝乜。

最重要，當然要安裝返銀行APP啦。記得以前係要入密碼，攪一大爛餐先裝掂。現在就先要用相機拍你的身份證，然後用人臉識別去確認身份。過程真係好艱辛，拍身份證，一時話太近一時話太遠，有時話反光，有時話你手震。。。過得呢關，就人臉識別。最磨人就係親眼見到自己個老坑樣，真係慘不忍睹。而且失敗率很高；若失敗多次，就要從頭由身份證開始再來。摸左一輪，先發現，人臉識別最後一步，最好係除去眼鏡，佢先至會認到你個柒頭。咁就漸入佳境勒。

一切安裝好，星期三晚就可以買馬仔了。仆街丫，又輸我四十。早知遲兩日先攪啦。

有時真係覺得自己條命唔好，身弱，好一日，就仆街一個月，受不得富貴，過不了好日子。

不過都有好事發生。。。手機從新灌入軟件，好似反應快左，用電量低左。

早幾日將我的強積金從新分配，呢兩日升左四個巴仙。

我的種植計劃，虎尾蘭和黃金葛都長了新根，等我得閒，就去搵棵白掌。姨媽傢俬見到有得賣，但要成五十幾蚊，我吊你啦，呢類咁粗生的，點值呢個價。我以後就隨身帶把較剪，去到邊，見到就剪。

魚缸養水已經三個星期，開始長青苔了，水質仍然清澈。再等多兩星期啦！應該可以買魚勒。

星期五凌晨，銀行過數出糧了。十月份只休了一天，今次個數額係在此公司最高一次。望住個銀行戶口結餘，十分感慨。今次係人生中難得一次，收穫和付出成正比。

＝＝＝

總結：以後都係唔好認屎認屁，乜都認仆街！或者個天會可憐我，畀啖飯我食。

時來運轉

我現在工作的地方，主要的同工，都係巴藉人仕。有巴基之星，巴基之友，巴基之威，和巴基之勝。出入車場的司機和運輸工人，都八成係巴藉。即係我變成了少數族裔。

文化差異總會有，主要係佢地比較悠下悠下。或者說，係我地香港人太急躁。

不知不覺已經過了五個月，大家都夾得來。起碼佢地唔似之前個阿頭咁，老到矇鳩查查，一有事就發晒茅，自己唔識做，做唔好，反而指摘下屬幫唔到手。又唔會好似自閉仔咁，乜都唔講，指手劃腳，似啞的一樣；最弊係你同佢講，佢完全聽唔入耳。對住佢，血壓會爆升。

四個巴鐵之中，巴基之勝有糖尿病，所以好注重養生。另一方面，佢又識做人，講野有技巧，我一生中甚少見。

因為佢地都係穆斯林信徒，唔食豬肉，都會自己帶食物。巴基之威早餐會烚蛋，蘋菓；巴基之星就多數帶老婆準備的咖喱。巴基之勝就有時朝早來一個酸乳酪，加南瓜籽和腰果等堅果。我問過佢，佢話食南瓜籽，會好好訓。

你呃我唔到既，南瓜係老男人之寶，一定仲有其他好處。唔理咁多，我跟。就去買一樽，每次煮飯，就加一撮南瓜籽。食左兩日，真係訓得屙得。

睡得好，自然個人都醒神。

＝＝＝

馬季開鑼以來，輸多贏少。買披屎往往都係臨尾被追過跑第四。買位置Q就一、四；二、四；總之就係差一點點。輸到我抬唔起頭。

十一月一日，踏入馬季第三個月。收工返到屋企，開罐啤酒，刨下馬仔。唔～～～第一場，靖哥哥連續兩第二，練馬師挾威名而來，今次搵瀝高那來減磅，博殺格啦。但係賠率乏味。

第二、三場，PIERRE哥殺聲震天，必拚。但又係熱門，無肉食。點好呢？淨係頭三場都想爆頭。

攪早餐先啦。攪一大餐，食得來，都開跑了。

頭場靖哥哥買唔落手，就買艾兆禮披屎啦。哇哈哈，手到拿來，跑第二，派卅一蚊。

第二場點呢？PIERRE哥一定要買，方仔隻馬有分頭有近績，係個檔位唔好，要埋啦。再加隻周仔騎的冷馬，信人好過信馬呀。鐵三角位置Q啦。

但呢個時候，好撚眼訓。等唔到開跑啦，去眠啦。醒來已經成四點，打開手機睇下賽果，哇哈哈，中到正呀，派百三蚊呀！訓醒就收錢，夫復何求呀！再睇清楚，原來另一隻跑第四，睇返賽事重播，唉！只因個檔位太外，一早浪費體力太多，最後體力不支而僅得第四。否則我中晒三注，斬斷窮根勒。

不過點都好，幾耐冇贏過馬呀！十一月一開始就轉運啦！

＝＝＝

贏完馬返工，個人都精神D。半夜三點幾，個肚就作動。皆因晚餐係金針雲耳蒸雞，加油麥菜。不得以就去紥馬。質和量並重，非常滿意。心諗，又睡得好，又清左腸胃，今朝收工立馬上城門行山啦。

一放工就搶閘，去食個早餐，再搭車上城門引水道。點知行得兩行，個肚又作妖。明明出左咁多貨，點會仲咁急架。

條路我熟到爛，邊處有膠箱廁所，了然於胸。但係就係內急不饒人，幾次差點崩潰。終於捱到膠箱，衝入去就除褲，遲一秒都出事。辦妥事，一頭汗。但感恩及時趕到，之後的行程，就會輕省，可以享受沿途風光了。

＝＝＝

回到市區，返家途中，想起件事。就係去姨媽傢俬買個蒸架。呢件野係放在一個煲上，下邊可以煲湯煲粥，上面就順德桑拿火煱。蒸青口，蜆，牛，餃子，菜。。。食完上面，下面吸飽了肉汁鮮味，白粥都好味啦。

＝＝＝

十一月開局順利，隨後一定順風順水，事事稱心！

魚缸人生

近來，個人好低沉。日日都懨懨悶悶。

早幾個月，買左個八百蚊的結他，入左盒都冇彈過。跑馬呢，迫自己每次賽事都投注，但係都冇心機去刨馬仔。連呢兩樣僅有的嗜好都停頓了，係咪有問題呢？

係！又死一件。阿大師早幾日仙遊，都有關係。佢係我同期校友，認識但唔算熟，但係都有點感觸。唔講咁多，免得人地話我拉關係，抽人水。

吊佢老母！今朝決定收工就上川龍飲茶，然後行引水道，釋放負能量，和內觀自身和內心，到底係乜事。

上到川龍茶居，立馬去開茶，見到有一個客好熟口面。望真D，原來係肥貓老母，肥貓老豆都在。佢地結束左間舖，現在上來飲茶，享受人生，替佢高興。當年佢地唔准人摸肥貓，所以我係不受歡迎人物。今天都費事吊佢。

川龍水源真係沖茶一流，零舍唔同。飲到夠，食兩個點心之後就落引水道行。一路想，到底最近我係乜事，點解咁樣樣樣。。。

在引水道行左差不多一小時，我想到一個貼切的描述。我的生活就好似一個魚缸。一個濾水器，從右下端抽水往上，流過濾棉，在左上方將水放回魚缸。重覆又重覆。冇驚喜，冇例外。一切都可以預料，一切都毫無差錯。

好撚悶呀！

再想想，係咪要三餐不繼，債主臨門，你先至覺得興奮？當然唔係啦！但係，完全死寂的生活，又令人窒息。咁到底你想點？

唉！人，都係笨實的動物。

希望

耶撚講信、愛、望，又話最緊要係愛。

我經歷過六十個年頭，覺得最緊要都係希望。丁點希望都冇叫做絕望，幾咁悽涼。

＝＝＝

話說我買左個魚缸之後，洗洗浸浸，缸底沙和生物磁環由一開始浸出一盆混水，換水，搓洗，重覆又重覆，再浸到水清見底。第一步完成。

魚缸同樣的，浸，洗，換水，重覆又重覆。好乾淨了。

如是者，滿懷歡喜，執好個位，放好魚缸，注滿水，開著個氣泵和濾水器，加入水草。然後就等。

但係，淘寶來的水草，蜆，螺，真係慘不忍睹。蜆和螺全無生命跡象，好似去大牌檔食完炒蜆，只剩一碟売。第一份水草三株，原本每株有三塊葉，養下養下，只剩條梗。另一份係細葉的，養下養下，變成煲完湯的西洋菜。黃甘甘的梗，葉就散落一缸。見到都唔開胃。

而且壞死的水草，生出腐殖質，缸水好似有一層核突野浮面。屋漏兼逢連夜雨，個濾水器第三日就出問題，水抽唔上。重重打擊，無半點生機，係咪要跳樓呢？唔係我跳，係拎個魚缸上天台，掉落樓算數。

抽唔到水的濾水器，當然拔去電源，免得燒埋間屋。氣泵係太陽能的，我就由得佢。擺個陣花了我咁大氣力，當然乜都唔做住，由得佢自生自滅。

隔了兩天，望下個魚缸，發現條西洋菜梗，好似發芽喎。老花眼睇唔清楚，唔確定。再過一日，真係發芽喎。好在冇掉。跟著的兩天，以肉眼可見的速度，每日長出枝和葉添。燃起了一點希望。於是，又去攪下個濾水器。本來我日日都攪佢一下，佢都係唔長進。到我忍無可忍，再攪佢唔掂，就拆出去掉。仆佢個街，唔吊唔鬆化，呢一個最後通牒，佢竟然復活，回復正常。一下子，所有希望返晒來。

我冇買濾水棉，心諗有乜替代品呢？有勒！咖啡過濾紙，又平又環保，走去AEON，只係九個九，就有五十枚入。同時，淘寶買虎尾蘭和綠蘿，即係黃金葛，只送來了虎尾蘭，我知道有線大廈附近個公園有大量黃金葛，就帶埋較剪出去剪佢老母啦。

現在虎尾蘭用水養，好似有生根。黃金葛只浸了兩天，亦都冇死亡跡象。勝利在望啦。等我得閒，再出花墟買埋白掌，一個魚缸上長滿植物的願景，出現眼前啦。

等一切生長穩定，就去買兩粒螺，唔買得多，因為好撚貴，成廿幾卅蚊粒架。咁就可以清潔魚缸四壁，冇青苔了。再穩定下來，就去買一袋米奇，放落去養勒，生氣勃勃的一個缸，幾咁治癒呢。

＝＝＝

以上用紅色字的，全部都未發生，係個人願望。全部都係我一廂情願，構想出來的。如果個情況已經絕望，我仲想條柒咩。就係有一點希望，我先會有繼續打算的動力。

魚缸上我貼上了紙條，寫上了架設的日子，係十月十五日，今日一個星期有多了，水亦變得清澈。我打算養水養夠卅日，等缸內生態環境穩定化痰功能完滿，再去加蜆或螺，再過卅日，就加魚。

耶撚又話：信就是所望之事的實底，是未見之事的確據

如果冇希望，我得撚閒信個魚缸會變得美好咩。

至於愛，我愛條柒咩。一個魚缸，只係調劑生活的工具。有人喜歡，送過佢都仲得。

雜項

今晚上班途中，個肚又作怪。身在港鐵之上，衡量得失輕重，知道一定捱唔到公司。就上網查一下，下車站有冇廁所，在那裏。原來係有，找到一幅地圖，睇到我一頭霧水，只知在那一層。

列車到站，一開閘呀，就衝出去。幸好一切順利，搵到救命所，解決燃眉之急。

===

近來成日講死人野，都要講下另一面。

早幾日收工回家，遇到神算大媽。佢在一間粥舖打工，埋單計數，快而準。枉我讀咁多書，都拍馬追唔上。

我問佢去邊，唔係返粥舖咩？

佢話：唔撚做囉！我新抱有左，我辭工返屋企照顧佢囉！

嘩，咁撚開心呀！真係恭喜晒囉！

===

花鳥魚蟲。

淘寶網買了一堆東西。水草，仆街，死既。蜆，只有一堆壳。狠狠地留了劣評。

太陽能氣泵就要讚！幾好力。

黃金葛唔知點解送唔到，等回水。虎尾蘭成廿蚊一株，唔知種唔種得活。

唉！呢類東西，都係香港買啦！

===

反而我呢個孤寒鬼，煮飯時將指天椒，涼瓜的核，拎去種，都發芽喎。等佢出左籽葉，就移落盆種勒。

===

中秋時煮幾味，有新體會。

梅菜扣肉，原來入雪櫃冷蕆過再蒸，完全脫胎換骨。直情係鬆化。

蒸雞或浸雞，一定要用冰水浸，收緊層皮，斬雞時唔會甩皮。

樓上的湯包真係把鬼。花旗蔘冇味。

佐敦裕華超市的就平靚正。

一田賣的雞蛋，試過兩個幾一隻的，都係把鬼。不如買湖北蛋。

物以罕為貴

早幾日，一大清早，進入等放工階段，個肚打晒鼓。心諗，平時都盡量自己整早餐慳D錢，不如今日特別D，去粥舖食個艇仔炸兩啦。實在好耐冇食，十分之期待。現在的粥舖，好多都偷工減料，有D仲亂鳩咁來。自然就要搵間靠得住的去幫襯。太耐冇食，特別滋味。又唔係乜野矜貴野，純粹係太耐冇食，唔捨得食。今次滿足了心癮，開心左成日。

上星期朋友約我去大牌檔隊啤食野。由於公司編更小姐叫我自己選擇十月份邊日休息，咁我就選左剛過去的星期一晚休息。計一計數，原來一路工作了十九天才休息，收工的一刻，真係好興奮。又係因為稀罕的緣故。如果日日休息，邊會咁高興丫。

就係因為咁高興，呢一晚就飲多左。星期二朝早醒來，個人仍然頭腦不清。當然，呢一日一定要上水塘行下啦。八點幾就上到去，人少少，天氣涼涼，非常正斗。回程兜落竹林禪院，去為阿龍君唸幾句經。

經濟學的一個大前提，就係資源係稀少的。如果乜都大把，你不假思索，想都唔想就去做啦。時間多，錢多，就會今日去呢處玩，呢處食。。。唔會抽到一日去食碗粥都開心好一陣。我大把錢的話，仲得鬼閒去淘寶買零件返來修理手錶，修理CD盤咩？買過更靚的錶，更靚的音嚮啦。

網上有條片，葛優講：貧窮就像一道護身符，鎮住我所有邪念。貧窮讓我品行端正，作風優良。

我再加一句：得到的時候，更加珍惜，感恩，開心到紮紮跳。