攪了一大輪清潔和維修，心諗，我都應該為地主老爺UPGRADE下。現在只係用個月餅盒蓋來墊底，好似好屈質。於是上淘寶買了一瑰大理石，專用作地主的。買開就買左對迷你石獅子，放在地主位，驅邪鎮宅。
咁就出事啦！上到淘寶，無端端佢建議魚缸，我無端端就買左。買時睇個尺寸應該好細，我打算放檯面，養一條鬥魚，咁樣點綴下。點知來到，嘩！大到可以浸腳。唉！隨遇而安，因緣際會，乘勢變招啦。
結果，上網查過下，跟住所有社交平台，就不停推D有關水族的片我睇。咁。。。又要買D生物磁環，缸底火山岩，乜乜物物。買買買，連水草都買左一批次。
YT片又推左一條我睇，話虎尾蘭，吊蘭和白掌，改作水種，將根浸入水中，可以吸收水中的阿媽尼呀，佢D葉又可以吸淨空氣中的污物，連甲全都可以吸走。咁我又要去搵。。。附近一間賣花的，吊佢老母，貴到仆街。
結果，乜都要停一停。
現在有魚缸，我用水浸佢，浸左幾日。打算慢慢浸，有乜化學物都要浸洗清楚。水草都到左，冇得揀，立即放入魚缸，養住先。生物磁環和石春都到了，馬上浸水。
一切，都要浸水，換水，洗清洗楚。我打算得閒就換水，由得佢拖一大爛餐，最好拖到佢生青苔，咁就證明冇晒有害物質。
然後就將個魚缸上位。加水，放石放磁環，養水養佢七七四十九日。一邊去搵虎尾蘭等植物，扦插，將佢改作水種，放入魚缸。
又放七七四十九日，等到植物生長穩定，就去買蝸牛呀，蝦呀，或者魚呀。。。
＝＝＝
而家呀，到了浸浸浸階段。慢慢來，慢慢來。玩下花鳥魚蟲，做個文雅老坑。
