昨日之日不可留，今日之日咪戇鳩

最近，潮流突然興肉餅，咁，我咪試下做囉。我記得很多年前，見到有款小型攪拌機，一個摩打基座，配另外有幾個容器，內有不同形狀的金屬刀具，可以攪肉，攪蔬菜，仲可以打豆漿。一時身痕，見唔係貴，就買下來。之後做過幾次豆漿，就打入冷宮。今次整肉餅，就摷出來用。誰知一看，關鍵位置竟然自然分解，無法再用。只好掉棄。過程一點不覺得可惜，反而有一份舒暢感覺。可能一件野買了回來，長久放一邊不用，有點內疚，如今了左件事，唔係我整壞，唔關我事架，咁就好安樂。

其實還有一部ＤＶＤ機，又係放得太耐，自然壽終。曾經想過，留住先，等得閒拆開來清理下，或者有得救。最近終於開動了，但係藥石無靈，又係去了垃圾房。好啦，擺放左咁耐，終於有個了斷。

其實放左咁耐都冇使用，證明作用不大。失去都不可惜。但係上星期，有個ＮＡＳ，即係外置網絡硬碟，突然死亡。我使出渾身解數，才可再將佢上線，但係檔案已經損毀，咁就好大鑊。好多相片都存在當中。十多廿年來，我去行山的自拍，當時相對年輕的外貌，可能就咁失去。最可惜的是死鬼老豆，和死鬼食神的照片，都可能失去。

唉！假若如此，唯有在記憶中尋求了。要緊記，有擁有必定有失去，何必苦苦勉留，留唔住又惋惜呢？

＝＝＝

同工阿巴基之友，早前放左兩日假。回來後我問佢去左邊？佢拎出手機放段片我睇。原來佢和一班同鄉去了鹿頸燒烤。條友真係識嘆，有時就驅車上大帽山，有時就返深圳食烤羊。。。

其實，每逢星期日，大帽山上，都有一班尼泊爾人在燒烤。大約十年前，每星期都上大帽山頂，走麥徑第八段返落城門水塘，因為風景實在太美。而每星期，都必定見到一個鬼妹，瘦猛猛但係好強勁，一個人跑上山；另外還有另一組鬼仔，都係咁樣跑。

在中上環皇后街，有個小小的公園，我有次誤打誤撞入左去，不得了，地方細細，但係十分之清幽。入邊只得一個鬼婆，和幾個菲傭，坐在長椅上，或者睇書，或者乜都唔做。

香港人，都唔知忙乜，有寶唔去挖。反而外來者，會欣賞香港的美好事物，切切實實去享用。

見到巴基之友咁識嘆，我都唔執輸。心想，嘉道理農場未去過，一向聽聞觀音山上風景唔錯，唔去就笨啦，於是就約左個朋友一齊去。平時行山，我都一個人去，點解今次要搵人一齊呢？因為始終路途遙遠，我怕我到時諸多藉口，臨時縮沙。約左人就唔會勒。

當日天公做美，藍天一片，只可惜有煙霞，視野不太清，遠眺大刀刃，十分滿分只得七分。不過總體都係美好的一天。

心中盤算，濕鳩公園都未去過，摘個好日子，要去一趟。還有。。。未想到。

＝＝＝

朋友和我年齡相約，但係行完呢三小時之後，食完午餐，去車站期間，一路行就一路喘氣。我心諗，你剛退休一年，個女又剛出身，搵到份好工，可算是進入收成期，正好享受人生。但係行多步都勉強，未免可惜。

慶幸我雖然要做到死那一天，但係如今仍算會行會走，咪執輸，要多些四圍走動。

早兩日，落街掉垃圾和買菜，遇到食神老豆。佢一見我垃圾袋中有啤酒罐，就話：嘩！又飲到醉啦！

問起佢近況，佢話現在成日骨痛，若非今日有事，都唔會出街，攤床休息。佢話早前做化療，做到成個人散晒，現在做標靶治療。

食神老豆算係一條硬漢，見佢神態，應該都幾辛苦。識左廿年，最初見佢在天台圍欄築園圃種菜，佢話要安排定日後退休，要有細藝。再後來養埋食神，打算退休後就種下菜，玩下狗。但係後來每年過年後，佢都話老細加人工挽留，一年又一年，到成七十先至退休。但係退休後，佢話已經冇乜意慾出街，更加唔會去旅行。如今又有病，唉！

之後，我就想起呢首歌。

＝＝＝

每個人都有權利去爭取快樂。不過有更多人，自己唔快樂，就去阻止人快樂。佢地既快樂，就係見到人唔快樂。

好似太監陳咁，不單見你有機會快樂，就出來潑冷水，虛構事實來令你三心兩意。更可笑係，佢會無中生有。例如，佢成日話簡體字係設計給文盲用的。佢見到有十幾億文盲，佢就覺得人地好可憐，咁佢就快樂。但係，佢又唔見得識幾多隻字。佢又成日話大陸經過文革之後，人性已經磨滅去盡，十幾億人好可憐，佢就快樂。但又唔見得佢人性有幾光亮。

最可笑就係，佢成日話張國榮係因為愛滋所以跳樓。三唔識七，見一個天之嬌子要自尋短見，好折墮呀！佢就快樂。

我夠膽講，佢到死一日，都唔明白，如果一早將呢種睇人仆街就開心的時間和心思，去享受人生，會更加快樂。