慳左當賺左下集大結局之驚濤駭浪

話說呀，隻老舊石英錶想自行修理，經過我不懈努力，搵到個型號，上淘寶網下單，星期日就收到了。

呢幾日就培養情緒，再上網睇下視頻，下載有關技術文件，今朝就做佢世界。

簡單講，就係裝返個錶面，裝上時針，分針和秒針，上返個底蓋。但係當中有些細節，講到口臭都未講完。

快鏡去到安裝時針。大佬。。。支針又細又輕，我又老花，揸住個尖咀夾，又用放大鏡，又開電筒照，攪一大爛餐先裝上。輪到分針，唉！仲細仲輕，眼看就快套上，仆街！一野就彈飛了。

吊佢老味，去左邊呢？檯面冇，身上又冇，即係跌左落地，咁就同跌落鹹水海冇分別。

開罐啤酒呷一啖，點支煙扯兩嘴，定一定神。都要搵架。咪逐吋逐吋去搵。搵左一轉，冇。再呷啖啤酒。打定輸數，最壞情況係嘥左心機和七十人仔，頂多拎去海皮掉落去睇下水花啦！

再搵一轉。嘿，眾裏尋它千百度，驀然回首，條仆街正在燈火䦨珊處。

拿拿聲執起，極小心地，安裝好。仆街勒，唔記得要和時針對齊添。算了算了，再拆開來的話，又飛街就冇咁易再搵返。

輪到支秒針，細到仆街，試左幾次，用眼過度，好似要滴出血咁。決定放棄。三針變兩針，都睇到時間，收工啦！

現在就等佢行返一日，如果仲會行，日期有跳，咁就當賺左勒。