戇週週記

上星期日加左一更，即係話，要連續踩十三日，到昨晚先至休息。

本來早幾日個老友就約定星期日晚出去隊啤，點知臨時話又要養醫生，呢個星期都要休養。

咁好啦，咁我就認真休息下。放工返到屋企，攪下呢攪下路，食埋個早餐就去眠。到下午兩、三點左右醒來。本來打算出去四圍行下，但係個天好似隨時下大雨，結果都係留家消磨時間。上下網，打下上海麻雀呢個唔用腦的遊戲。結果攪到半夜兩點都冇睡意。唔得啦，明天一早要去自助洗衣，唔眠唔得呀。結果睡眠質素非常麻麻。到六點鬧鐘嚮，老大不願意下起身梳洗，拖住疲乏身軀去洗衫。

洗落衫，就去附近茶居飲茶，就係成日賣隔夜點心的一間。點解我仲去？冇法，因為獨市生意。我聰明無敵，想到避雷方法：就係坐響廚房門口，望住入邊師傅，到真係有開籠點心出，熱氣騰騰的，我先至叫。班點心大媽助紂為虐，把口就叫：開籠點心呀！但係一望就知，冇半點水蒸氣，昨日開籠啩？？？

今朝食左一籠豆苗餃之後，等極都冇點心出。眼看洗衣夠鐘了，就埋單走人。一結帳，吊佢老母，比之前貴左兩蚊！以前就過完年就加價；現在，過完清明都加貴，或者端午再加。冇計啦。。。

離開茶居，往自助洗衣店走。離遠見到有條友從間茶餐廳走出來。一眼就認出係爛口杰。兩星期前，都在此遇過佢。睇佢步履蹣跚，早知今日，何必當初呢？呢條友的生平，我之前有講過，以妨大家唔記得，現在簡述一遍啦。廿年前在某餐廳酒吧認識，當時佢正在人生頂峰，不可一世。但係發財唔立品，喜歡攪屎棍。正一人辦，攪風攪雨，挑撥離間，專門損人不利己，以為自己永遠在頂，要玩弄他人於股掌間。但係報應不爽，生意失敗，正職和私伙生意都一鍋端，要走去做看更。不久後，更輕微中風。當時在街上遇見，見佢仍然臉部肌肉不協調，隔了很久才回復正常，但言談間，聽得出記憶已大不如前。如今行路仍然拖泥帶水，就係後遺症。

報應呀！兩星期前遇上，吹下水。佢話佢當日要上深圳賣樓，仲話當日老母在生，有人出二百萬，老母堅持要兩百三，賣唔成。如今老母去世，跌剩一百萬才賣出。又提起佢個仔，唔知幾時講過，話佢去左澳洲學揸飛機，就問佢仲有幾年讀？佢話三年。哦。。。佢話過年前返過來，但留左兩日就飛左去雲南，因為在番邦識左條女，係大陸人。咁就梗係去大陸過年啦，唔該老豆找數。

之後我諗，個天真係絕。我有個老友個姪仔，早幾年因為睇完衝上雲宵，嚮往飛機師生涯，都問老豆攞錢去澳洲學揸飛機，結果一年左右就話唔合適，退左學。我老友當時都講，你要揸飛機，物理、數學、流體力學，都要有概念卦？條友讀書一塌屎咁，都有學校收，都唔慌好野。後來我聽人講，澳洲佬呢類課程，其實係揸小型飛機，盲既都可以讀，只要你畀錢。之後係冇途徑接駁民航機課程架。咁，即係倒錢落海。返到來香港，可能連飛行服務隊機師都做唔到。

而家呢條爛口杰個仔，溝左女，就日日在番邦酒池肉林啦，此處樂、不思蜀啦～～～課程四年，話唔定讀足九年。老豆深圳賣樓，話唔定係要供條化骨龍讀書啦。

之後，去乾衣，收衫。。。就上城門行山啦。天氣潮濕得很，但係唔覺翳焗，都算幾舒服。腳傷總算好了九成，尚有少少問題，不過行起來都還可以。一路享受呢個寧靜早上，一路策劃今晚的晚餐，不亦樂乎。

好啦，今日有馬跑，早早返歸準備，希望今日贏佢老母一大筆啦！