我的四頭肌

星期日早上收工，見到天色難得轉晴，心大心細，好唔好去行山呢？返到屋企，煮個麵食，去開個大。決定上大帽山。山上都幾清涼，但係空氣污染，能見度極低。山上遇到大量攝映發燒友，係專打雀一類。個個長炮鏡頭，所有器材加埋，少說都成百萬。

我就嫌人多，急急腳就遠離呢班人。平時我多數行去田夫仔、經清快塘落深井，今次改變下，經石龍拱返落荃灣啦。條路鋪設得很好，但係唔知點解，大腿肌肉感到吃力，個人亦不停出汗，棉質TEE全濕透。

落到荃威花園，企埋一邊食口煙休息下。剛巧有個的士佬停車下來吹水，佢話接左個客，在此等候。四海之內皆可吹，我就問佢，你地係咪上晒各式各樣約車平台？佢話係呀，現在限制只可有兩部手機，佢就一部上兩個、另一部三個，合共上左五個平台。仲同我訴苦，都唔一定搶到單，一見到有CALL就接，但往往總係唔夠人快，吹漲。吹左一陣，佢就去接客，我就繼續回家。

途經體育館，就順便入去量下血壓和體重。體重百七磅，BMI剛好算正常。量血壓就好驚嚇，１１８／７８，咁正？有時係高到１６０喎。隔一陣再量，都係差不多。呢D血壓機人盡可夫，會唔會壞左呀？於是返屋企再驗，真係冇錯喎。呢排食左乜？還是運動出一身汗後的關係？唔知。

星期日，都係跑下馬和飲飲食食。馬仔就輸左卅元。呢排當黑，知道要收歛，但係馬事不能荒廢，點都要參與。事實證明，黑氣未除，買披跑第四。吊佢老母。飲食又係打邊爐，買有皇帝菜，半點味道都冇。吊佢老母。

當晚睡到天昏地暗。星期一醒來，唉喲，我的四頭肌，即係大腿的一組肌肉，扯住扯住痛。但係呢種痛，係開心痛。沖茶飲一輪，又煮個麵，加埋昨日剩下的餃子，又一個早餐。等唔到屎屙，又出發上城門。

唉！右腳本來都好了九成九，昨日行得太甘，今日又發作。簡單行左五、六公里就回程了。

＝＝＝

新聞話：柒朗普晚宴上出現槍手，被特警制服。但係之後網上的反應，多數話係做戲。可見呢個大蠢桶，信用係零。槍手的網上發言流出，有訪問者讀出呢篇文來問佢，佢立即話自己唔係強姦犯、唔係孌童癖。訪者立即問：你覺得佢係指你咩？

＝＝＝

同工阿巴基之友，上星期六去飲，係朋友娶新抱。我好奇佢地婚宴係點，佢拎出手機，畀我睇相片。原來朋友兩個仔一齊結婚，在佐敦一個佢地巴鐵的會所之類舉行。只見兩個新郎哥都係著西裝，有點失望，以為佢地會以民族服裝上陣。問佢新娘呢？佢話冇架，所有女人在另一個區慶祝。回教徒係咁加。。。又長見識了。

＝＝＝

網上平台推文，話有俄羅斯帝皇蟹罐頭，廿幾蚊一罐。我聽聞呢隻野在冰水中生長，所以生長極慢，因此肉質鮮美。但係又數量驚人，唔捕殺就會有生態危機，或者就係，所以好平卦。咁我就上淘寶買。點知到收貨時，原來係金槍魚，即係吞拿魚。上返淘寶睇，中招啦。吊佢老母奸過鳩。

＝＝＝

上星期某天，清潔阿姐同我講：我做埋今日唔做啦。我問佢有高就？佢話去太子汝州街包餃子。哦～～～好丫～唔駛起早貪黑，起碼乾淨D，有冷氣添。佢話：以前清理外圍，有幾個人一齊做，現在大家姐想佢一個人做晒，做死人咩？

早兩日，樓下七仔的大媽收銀員同我講，呢間舖五月就結業啦。我知佢老細在附近總共有三間七仔，就問佢係咪調過另外一間。佢話：唔撚做啦，索性退休啦。我話：好丫！嘆世界囉。

呢個世界，至緊要係有得揀，如果你冇選擇權，就只能任人劏。

＝＝＝

公司平時月底前一個星期左右，就會有下個月的更期通知。但係今個月就遲遲未有。咁我就好撚擔心勒。公司最近有新政策，變相減左人工，證明經營困難。我心諗，會唔會走佬架？

遠在１９９７年，我就被老細拖我糧。之後又試過唔清唔楚出唔足糧，又有離職後七日都未出糧，打電話去追，個八婆仲話，未出咪未出囉，你等下啦！我話我去勞工處！佢話：呢個係你意願，你喜歡就去。我話：好，我去搵埋區議員，東方蘋果，揭你臭史！咁佢先叫會計出票。

今次如果真係拖糧或走糧，我就買天拿水，上去公司坐嚮門口，你唔出糧我就燒你全家！