戇下戇下又一週

星期日早上收工，巴基之友問我係咪去行山？我話睇下點啦～～被佢挑起條癮，又兼且之前腳痛，已經很久沒有去過西頁了。想啊想，又記起很久冇食過雲吞麵，就去食返碗廿七元，性價比超高的雲吞麵。很滿足。

回到家中，茂下屎坑，決定遠征。整理行裝之時，碰跌了個結他袋。就係年初四買的新的二手結他送的，一摸之下，發現傍邊小袋入邊有異。打開來看，原來有個名牌的調音器，和一個拾音器。哇！四舊水竟然仲有野送？後來上網一查，呢件野通利原價都要一百二十，嘿！真係行狗屎運。

跳上往北潭涌的巴士，係兩蚊兩折以來的第一次。以前兩蚊就可由荃灣去到西貢黃石碼頭，如今要五元多。不過，都係超值。

上到車坐好，就掏出副耳機塞進耳窩。就係我上淘寶買來做助聽器耳模的泥膠，令其更加密封，不進半點外來雜音的耳機。音色唔錯，加加埋埋都係三百五，只係樣子寒酸些。

巴士去到綠楊新村外圍，就塞起車來。塞到完全唔郁。十五分鐘，卅分鐘。。。我打開谷歌地圖查看路況，吊丫！就在前面紅綠燈位開始塞。如果落車行，不用五分鐘。結果等了五十九分二十八秒，郁了。行過燈位，乜野痕跡都冇，唔知發生乜事。

結果用了兩小時才去到北潭涌，轉車入黃石，就沿路行返北潭涌。嘩！真係唔好講笑，四月天氣已經好熱，太陽曬得很毒。我行左十分鐘，就覺得氣管熾熱，心臟好似被抓住一樣。心諗，會唔會係冠心血管閉塞，好似太監陳咁，死梗啦！你死梗啦！

我又唔怕死喎，如果係行山死，真正求之不得。乾手淨腳，死在大自然懷抱裏，好過死在家裏，連累埋包租公。挺起腰，一步一步行。去到北潭坳前的一條長命斜，來吧！COME　WHAT　MAY！點知愈行愈順，上到頂，小個便，氣管和心口的不適都消失了。不過都係太耐冇行山，量力而為啦。況且我為自己定下了規矩，如果攜帶的水飲完，就要撤退。到此樽水都所剩無幾，就等巴士走人。

上左車，就盤算午餐如何打發。結果決定打邊爐隊啤。回到荃灣就去AEON買料，十八元急凍青口，廿三元餃子。再去街市買菜和豆腐，咁就攪掂。

途中，我感覺到後面有個人行得好近，仆你個街，跟得咁貼，想老笠呀。去到紅綠燈位停低，我就扮睇車向右望。後面條友，原來係個女子。

仲係一個美女。

我用了三微秒掃描了一遍，就望返前面，等綠公仔。分析得出，應該都四十左右，但係一定有定期保養，新車一樣。利害利害。佢一臉自信，一定以為我會望到流口水。傻啦！六十歲的男人，仍是喜歡十八歲的少女。你慳D啦。轉左燈過馬路，佢向右時，我本來都向右，不過就索性向左，先去買啤酒。萬萬不能讓佢有半點虛榮感。

返到屋企，睇下跑馬，頭幾場都爆喎。呢輪輸到頭暈，都係唔好妄動。到唔知第幾場，多手買左十蚊潘頓披屎。臨開跑時突然急屎，就走去茂塔。聽住講馬佬的傍述，十蚊又泡湯。收拾心情，打邊爐，杯葛你，你吹咩？

飲飽食醉，再上網遊下遊下，才六點幾。都累了，上床去眠。到半夜十二點幾醒，非常滿意，平時有幾何可以睡六個小時？摸下摸下，到四點幾，就去自助洗衣。到全部攪定，已經六點幾。坐定定合起眼，再醒來已經八點半。點呢？

都係上城門啦。

天氣真係開始熱。飲水量都多。到莫水時，係時候撤退。就走落象山邨啦。都差不多十一點，冇理由去飲茶食點心，就去了頂層的小食店。聽過網紅介紹過，佢最出名係隨時唔開門，和入邊的上世紀的裝修。

入門後只見有一個老坑客，飲緊奶茶。收銀處冇人，只得水吧內有一個後生仔，戴住口罩，著雞翼袖衫，肌肉結實。你做飲食，唔係做咕喱，練咁大隻，唔駛講，一定係想勾引中午來食飯的學生妹啦。

我叫左個早餐A，熱奶茶，卅三蚊。奶茶不過不失。蛋就係平價蛋，沙嗲牛，就有苦味。食下食下，食下食下。。。跟住點呢？梗係食完晒啦！但係我有種感覺，好神奇。好似時間停頓左。又好似一切回到上世紀七、八十年代。我好似變回當年的我，無憂無慮。

吊那星！咁撚邪？都係返屋企先。

過兩日，我會再回來，查探究竟。