2026年11月9日星期一

之唔係又係帶眼識人囉

九十年代,股市興旺。

我的工作範圍,就係一套管理股票登記系統,轉讓呀,各樣各樣的。IPO公司上市,如果超額認購,就要抽簽,程式就係我寫的。

當時搵工,大家都睇一份MI報。MI報要上市集資市,人人睇好。以為抽到股票就立即大賺。

不幸地,被我發現了,我的老細,改了我的程式,讓佢的認購表格,經過呢個程式就必中。當時老細正和另一個同事起了矛盾,弄得不愉快。而我們一班後生仔,揸住呢單野,收集了證據。

碰巧是聖誕節,我就將原程式碼,再加一張寫了MERRY CHRISTMAS的字條,趁老細不在,就用公文袋裝好放到老細桌上。

話都冇咁快,老細就有動作。同佢有矛盾的同事,碰巧請了病假,佢就同上頭講,佢明查暗訪,根本冇呢個醫生,係呃病假。要做死呢個同事的誠信。我查過電腦紀錄,條友連佢親信都唔放過,全部人員在電腦上的紀錄都查過一遍,想搵出係邊個隊佢。

我一貫鵪𪂹,老細估唔到係我。我就越級向老老細舉報,老老細當然唔想上身,再上奏天庭。一番折騰,搵來集團保安大佬,條友明明係鬼佬,但廣府話講得純正。佢個細佬大鳩我,話我現在攪到人人都知,我話我想全世界都知。

結果老細知道攪黃左,監都有得坐。只好認罪,求得個淨身出戶。乜鬼長年服務金都唔要。

最後老老細搵我傾,話咁咁咁咁,你滿唔滿意?仲有冇後續行動?即係想問我仲要唔要報警。我想佢都好大鑊,就算撚數。

當時我已經遞左辭職信,當然亦冇人會挽留。

當然啦,留低,都唔會有好日子過。

事情發展中,我都有和屋企人講過。知道有風險,隨時被人屈成犯人,就好撚大鑊。

但係,到後來知道洗清嫌疑,屋企人就掉轉方向,話我處事唔成熟。亂鳩咁辭職,完全冇責任心,乜都係我錯。有乜事就提返出來吊鳩我。

所以呢~~~帶眼識人,包括你屋企人。

仲係帶眼識人

講人地容易,講自己就~~~

老實講,我就真係唔識得帶眼識人。一次又一次,重覆又重覆,都被熟人坑害。

我以前認為,大家傾得埋,圍威喂,一齊去砌,一齊去搵機會,大家都讀了一輩子書,有技術,有點子,一齊去闖個未來。

其實九十年代,我就想了一個類似現在price.com.hk openrice.com之類的東西,專做電器的格價專家之類的網站。搵埋三個老同學,兩個管技術,兩個管營銷,拍住上,開創一番事業。

但係你想,可以。人地點想,你管不了。兩個SALES佬,只想吃白食,你地做晒,佢地割韭菜。講就天花龍鳳,要做野就變身隱形俠。最後自不然係冇成事。

最笨實的是,之後我笨到再被呢兩個SALES佬,各跣一鑊,攤攤腰之後才講一句:我吊你都仲得!咁先斷絕來往。

===

到了千禧年,HOTMAIL大盛,手機還未有智能,但已有基本上網功能,有樣叫WML的東西,現在當然入左博物館。當時我攪了一壇手機電郵系統,成功可以用手機發和收文字電郵。但係我只曉得埋頭苦幹,要推廣,點做呢?

我先後問了四個人。

一個老實回答,呢方面佢冇認識,幫不了我。呢個朋友,現在仍是好朋友,經常見面。

其餘三個,全部狗UP當秘笈。簡而言之,就係太監陳之流,見不得你好,潑盡冷水。

事實係隔了兩年,和記才推出同類的電郵系統。

===

上面講的三個人,有一個係親屬。

咁當然要怪都係怪自己,你患得患失,人地一潑冷水,你就縮,你材料有限啦。認命啦!


===

最大問題係:呢三條仆街,我都唔係即時吊佢老母,要過很長時間先斷絕來往。呢個就係帶眼識人的要點。你睇唔到重點,咁係你的問題。

又係帶眼識人

最近醒起,我個扑係聯上了谷歌的廣告,應該係收錢的一個途徑,點解咁耐冇錢收呢???查返原委,原來係某年谷歌改了合作條款,當時唔知乜野原因,冇跟進,咁就冇再收錢了。現在人窮思變,開通返呢個渠道,睇下有冇錢途。

咁第一樣野,就係睇下我寫乜最多人睇啦!就最近的博文,原來一篇帶眼識人最受歡迎。咁就講我見過,有關帶眼識人的故事啦。

就我的記憶,我只對一個人講過呢句帶眼識人,就係對大口娟講。

當時成日蒲餐廳酒吧,在吧檯坐得久,見了不少人生百態,亦和一班餐廳職員變得熟落。

大口娟長期做吧頭,份人傻更更,大家都嘻嘻哈哈。我成日笑佢個口大,佢就話我把口衰到冇人有。成班餐廳職員,都係廿歲出頭,有幾個仲係中學畢業後第一份工。好自然,好色慕少艾,好多就在職場中談起戀愛。侍應和廚房佬,廚房和洗廁所,阿貓同阿狗。。。。

大口娟亦和一個佢話貌似方力申的同事,以國內用語,處起對象,仲同居起來。但係不久之後,呢個男方就轉工,再不久就聽到女方問人借錢。皆因男方大駛夾爛賭,賭波欠下債項,女方問家人借過錢,幫過一次,但仍然依然故我,不得已都要斬纜。轉埋電話去表示決絕。

紫釵記中黃衫客有句金句:暖酒看炎涼,冷眼參風月。一班人坐在吧頭,有意無意都會觀察到其他客人。其中有一檯客,一男一女,帶一個小童。兩個大人經常飲到醉勳勳,個細路就無皇管,四圍走。後來得知,女方係已婚之人,但老公唔係呢個男子。咁就~~~

呢個男子,你成日同人地老婆飲到醉,不知有何居心。淨係帶埋人地個仔去飲酒,已經要打八十大板。可能佢平時埋單,貼士好闊綽,一班女侍應都話呢個係筍盤。我地一班老派人,當然唔認同。

後來另一女侍應和男友本來都一同夾份買樓同居,不知何故而鬧翻,呢個所謂筍盤男就乘虛而入。但係不久後又始亂終棄,改向大口娟埋手。我地一班塘邊鶴,都不恥其行為。

大口娟可能久旱以為逢甘露,十分受落。我地都勸佢,唔好盲目追求愛情呀。。。我就係呢個時候講:帶眼識人呀!

後來某些原因,我不再去呢間餐廳,事情如何不得而知。某日在街上遇上大口娟,大家CATCH UP,佢話一班女同事,一個二個都結婚生仔。再過一段日子,佢都發訊息話結婚,邀請一班熟客去參加婚宴。我就唔知男方係乜水,會唔會係呢個呢?不過我都托詞冇去。理鳩佢啦。。。

個故事係咪冇頭冇尾呢?大佬!擺到明係搵水啦!遲下我研究埋YT,B站頻道,睇下有冇得拍下片搵錢。大家多多支持,幫忙點下廣告。感激感激。

疲倦

昨晚開工後不久,就閤著了眼。巴基之勝見到,就叫我轉位,早D休息。鎖你鎖你,不過都老實不客氣,就走去睡。自從上月十二日休息過,就一直踩到現在,即係廿七天連續了,唔死都算硬淨。

亦都有個可能,就係日間我煲了個沙蔘玉竹蓮子百合無花果湯,潤肺抗燥,因此特別好訓。

===

過年前買了本通勝,現在到年尾了,發覺冇乜點用過,唔得咁浪費。於是我就查下那一天宜理髮,就依呢個黃曆來行事。得出上星期六宜理髮,一早收工回家,洗個頭就去飛髮。

因為時間早,冇客,一去到就飛得。飛髮佬突然問我:人老左變乜?

我呆一呆,你都問得奇怪,答:人老左咪變老人囉。男人就變老男人,女人就變老女人。

我答得合情合理丫,點知佢話唔係。

飛:我意思係人老左應該點做。

我:吊,你真係老到濛鳩查查,講清楚丫嘛。

飛:人老左,最緊要兩公婆唔好咁恩愛。

我:唔~~~ (都唔知你講乜鳩)

飛:兩個太好感情,一個死左,留低一個老野,好慘情架,個心真係會痛架~~~

我今年八月才發現呢個架步,今次係第三次幫襯,有兩次都聽佢提起個死鬼老婆去世,好似都係一年內的事。原來呢條友係癡心情長劍,呢樣野,我幫你唔到勒。講下講下,佢又講歷史,話響呢處開左舖四十年。我大返佢,我響呢頭前後住左成五十幾年啦!你呢個舖位,以前係一個小型製衣廠,樓下係茶居。我七幾年已經搬左入來啦。咁佢先收聲,話佢七幾年先落香港。

劍飛哥雖然講野唔清唔楚,不過剪頭髮功夫絕不含糊,下次都會繼續幫襯。

===
通勝又話,星期四宜納畜,我估都適用於買水族魚類卦~~~都差不多日子了,一於到時去買袋最平的孔雀魚來開缸啦。

===
星期日一早,準備煲湯之餘,又準備賽馬。睇落好似何傑青手馬好勁,阿神仙蔡又似博殺,篤篤篤篤,就買左條五串廿六位置Q單棍過關。買完馬,煲落湯就走去瞓。醒來發覺一地水。原來個濾水器個出水口被生物磁環塞住了,如果再遲D起身,成缸抽乾添。馬上熄機,拖地。做死阿叔了。

幸好個湯都煲完,好清甜好潤。一個人就飲完一煲,卅蚊豬𦟌肉全部落肚,晚飯都唔駛食咯。

睇馬仔,哇哈哈!頭關順利過關。一條五串廿六,就變成四串十五了。之後每中一關都有錢收,中得愈多,收得愈甘!

第二關,仆街丫,中得一隻,咁就變成一條三串七。

第三關,哇!爆大冷,我再貪心都唔敢咁樣買。變成一條二串三。

第四、五關各中一隻,一場好夢,化成殘夢,全日輸一百元整。

作為一個資深馬迷,要有輸不死精神。下次再同佢死過。

===
今朝收工,打算回家就去自助洗衣。點知回程途中,內急起來。昨晚就係飲湯當飯食,可能無花果有潤腸功效呢~~~

幸好及時趕到,不至闖禍。

昨日買的一堆藥材,打算十一月再煲兩次湯,潤完個肺,十二月就煲壯腰補腎的湯水了。

老男人要照顧好身體,要活得自在,會行會走,食得屙得訓得!

2026年11月7日星期六

身弱

上次星期日贏完馬仔,就鬆毛鬆翼,話自己轉運。結果星期一晚就出事,部手機無端端神左,BOOT唔起。上網搵左好多原因和解決方法,但都不適用。折騰了廿四小時,期間想到很多問題。淘寶下了單,就快到貨,冇手機點收貨呢?冇手機,完全和世界斷絕,朋友會唔會搵我唔到,又搵上門睇下我係咪猝死家中呢?如果真係救唔返,去邊處搵錢買過部手機呢?星期三夜馬,冇得投注。。。世界末日啦!

常言道,事情未必好嚴重,但係你的想法,思路,想得太多。。。就可以好嚴重。 呢個真係珍珠都冇咁真。果種折磨,真係攞泥賤。

星期二晚,寧為玉碎,一於剷佢老母!我知道要從新安裝所有APPS,真係好撚煩,但係既然冇辦法解決,最壞情況,都係舊機報銷,花錢買過部。咁老虎加隻蟹,博一博啦。就將部機重置、推倒重來。

嘿!又BOOT得起喎!真係唔知到底係乜問題。於是乎,由八點,一路重新安裝,攪到十二點才大致回復。之後隨時想起有乜,就再安裝乜。

最重要,當然要安裝返銀行APP啦。記得以前係要入密碼,攪一大爛餐先裝掂。現在就先要用相機拍你的身份證,然後用人臉識別去確認身份。過程真係好艱辛,拍身份證,一時話太近一時話太遠,有時話反光,有時話你手震。。。過得呢關,就人臉識別。最磨人就係親眼見到自己個老坑樣,真係慘不忍睹。而且失敗率很高;若失敗多次,就要從頭由身份證開始再來。摸左一輪,先發現,人臉識別最後一步,最好係除去眼鏡,佢先至會認到你個柒頭。咁就漸入佳境勒。

一切安裝好,星期三晚就可以買馬仔了。仆街丫,又輸我四十。早知遲兩日先攪啦。

有時真係覺得自己條命唔好,身弱,好一日,就仆街一個月,受不得富貴,過不了好日子。

不過都有好事發生。。。手機從新灌入軟件,好似反應快左,用電量低左。

早幾日將我的強積金從新分配,呢兩日升左四個巴仙。

我的種植計劃,虎尾蘭和黃金葛都長了新根,等我得閒,就去搵棵白掌。姨媽傢俬見到有得賣,但要成五十幾蚊,我吊你啦,呢類咁粗生的,點值呢個價。我以後就隨身帶把較剪,去到邊,見到就剪。

魚缸養水已經三個星期,開始長青苔了,水質仍然清澈。再等多兩星期啦!應該可以買魚勒。

星期五凌晨,銀行過數出糧了。十月份只休了一天,今次個數額係在此公司最高一次。望住個銀行戶口結餘,十分感慨。今次係人生中難得一次,收穫和付出成正比。

===

總結:以後都係唔好認屎認屁,乜都認仆街!或者個天會可憐我,畀啖飯我食。

2026年11月2日星期一

時來運轉

我現在工作的地方,主要的同工,都係巴藉人仕。有巴基之星,巴基之友,巴基之威,和巴基之勝。出入車場的司機和運輸工人,都八成係巴藉。即係我變成了少數族裔。

文化差異總會有,主要係佢地比較悠下悠下。或者說,係我地香港人太急躁。

不知不覺已經過了五個月,大家都夾得來。起碼佢地唔似之前個阿頭咁,老到矇鳩查查,一有事就發晒茅,自己唔識做,做唔好,反而指摘下屬幫唔到手。又唔會好似自閉仔咁,乜都唔講,指手劃腳,似啞的一樣;最弊係你同佢講,佢完全聽唔入耳。對住佢,血壓會爆升。

四個巴鐵之中,巴基之勝有糖尿病,所以好注重養生。另一方面,佢又識做人,講野有技巧,我一生中甚少見。

因為佢地都係穆斯林信徒,唔食豬肉,都會自己帶食物。巴基之威早餐會烚蛋,蘋菓;巴基之星就多數帶老婆準備的咖喱。巴基之勝就有時朝早來一個酸乳酪,加南瓜籽和腰果等堅果。我問過佢,佢話食南瓜籽,會好好訓。

你呃我唔到既,南瓜係老男人之寶,一定仲有其他好處。唔理咁多,我跟。就去買一樽,每次煮飯,就加一撮南瓜籽。食左兩日,真係訓得屙得。

睡得好,自然個人都醒神。

===
馬季開鑼以來,輸多贏少。買披屎往往都係臨尾被追過跑第四。買位置Q就一、四;二、四;總之就係差一點點。輸到我抬唔起頭。

十一月一日,踏入馬季第三個月。收工返到屋企,開罐啤酒,刨下馬仔。唔~~~第一場,靖哥哥連續兩第二,練馬師挾威名而來,今次搵瀝高那來減磅,博殺格啦。但係賠率乏味。

第二、三場,PIERRE哥殺聲震天,必拚。但又係熱門,無肉食。點好呢?淨係頭三場都想爆頭。

攪早餐先啦。攪一大餐,食得來,都開跑了。

頭場靖哥哥買唔落手,就買艾兆禮披屎啦。哇哈哈,手到拿來,跑第二,派卅一蚊。

第二場點呢?PIERRE哥一定要買,方仔隻馬有分頭有近績,係個檔位唔好,要埋啦。再加隻周仔騎的冷馬,信人好過信馬呀。鐵三角位置Q啦。

但呢個時候,好撚眼訓。等唔到開跑啦,去眠啦。醒來已經成四點,打開手機睇下賽果,哇哈哈,中到正呀,派百三蚊呀!訓醒就收錢,夫復何求呀!再睇清楚,原來另一隻跑第四,睇返賽事重播,唉!只因個檔位太外,一早浪費體力太多,最後體力不支而僅得第四。否則我中晒三注,斬斷窮根勒。

不過點都好,幾耐冇贏過馬呀!十一月一開始就轉運啦!

===
贏完馬返工,個人都精神D。半夜三點幾,個肚就作動。皆因晚餐係金針雲耳蒸雞,加油麥菜。不得以就去紥馬。質和量並重,非常滿意。心諗,又睡得好,又清左腸胃,今朝收工立馬上城門行山啦。

一放工就搶閘,去食個早餐,再搭車上城門引水道。點知行得兩行,個肚又作妖。明明出左咁多貨,點會仲咁急架。

條路我熟到爛,邊處有膠箱廁所,了然於胸。但係就係內急不饒人,幾次差點崩潰。終於捱到膠箱,衝入去就除褲,遲一秒都出事。辦妥事,一頭汗。但感恩及時趕到,之後的行程,就會輕省,可以享受沿途風光了。

===
回到市區,返家途中,想起件事。就係去姨媽傢俬買個蒸架。呢件野係放在一個煲上,下邊可以煲湯煲粥,上面就順德桑拿火煱。蒸青口,蜆,牛,餃子,菜。。。食完上面,下面吸飽了肉汁鮮味,白粥都好味啦。

===
十一月開局順利,隨後一定順風順水,事事稱心!

2026年10月28日星期三

魚缸人生

近來,個人好低沉。日日都懨懨悶悶。

早幾個月,買左個八百蚊的結他,入左盒都冇彈過。跑馬呢,迫自己每次賽事都投注,但係都冇心機去刨馬仔。連呢兩樣僅有的嗜好都停頓了,係咪有問題呢?

係!又死一件。阿大師早幾日仙遊,都有關係。佢係我同期校友,認識但唔算熟,但係都有點感觸。唔講咁多,免得人地話我拉關係,抽人水。

吊佢老母!今朝決定收工就上川龍飲茶,然後行引水道,釋放負能量,和內觀自身和內心,到底係乜事。

上到川龍茶居,立馬去開茶,見到有一個客好熟口面。望真D,原來係肥貓老母,肥貓老豆都在。佢地結束左間舖,現在上來飲茶,享受人生,替佢高興。當年佢地唔准人摸肥貓,所以我係不受歡迎人物。今天都費事吊佢。

川龍水源真係沖茶一流,零舍唔同。飲到夠,食兩個點心之後就落引水道行。一路想,到底最近我係乜事,點解咁樣樣樣。。。

在引水道行左差不多一小時,我想到一個貼切的描述。我的生活就好似一個魚缸。一個濾水器,從右下端抽水往上,流過濾棉,在左上方將水放回魚缸。重覆又重覆。冇驚喜,冇例外。一切都可以預料,一切都毫無差錯。

好撚悶呀!

再想想,係咪要三餐不繼,債主臨門,你先至覺得興奮?當然唔係啦!但係,完全死寂的生活,又令人窒息。咁到底你想點?

唉!人,都係笨實的動物。