爛賭

星期日一早收工，返到屋企，咪咪麼麼，跟住就眠。到十二點五十分醒。咦！跑馬喎，今季尚未開齋，馬上開電視，已經第二場。望來望去，都唔知買乜好，於是亂咁來，買十元位置。到最後四百米，見到都有走勢，但係力水不足，最後二百就知道倒錢落海。

吊！買條六合彩，熄電視再眠。再醒時，唔知幾點，只知跑到第六場。先前煲好的排骨粥食得。食完又去眠。好似眠左千個世紀，慢慢恢復意識，天黑黑，攤在床上。確認不想再睡就起床。吊，原來係晚上八點幾。

眠左咁耐，條腰都冤冤地。上網睇一大餐YOUTUBE，又轉睇電視賽後報告。年紀老邁，睇完都唔記得有乜野馬。睇下節目表，有英超睇喎。轉過去一睇，原來半場休息，紐卡素１：０阿仙奴。賭癮起，上網買阿仙奴贏，有３倍幾。

下半場開波。阿仙奴老鼠拉龜咁，都埋唔到手。時間一分一秒流失，看似又倒錢落海。去到八十幾分鐘，唔知點樣，有條友跳高，側頭一跣，咁就柱邊入網。原來阿仙奴追成平手喎。但係冇時間啦，就快完場。傍證出來舉牌，補時八分鐘。進入補時四分鐘左右，又唔知點樣，又有人入波喎！原來阿仙奴２：１反超前。哇哇哇！叫糊啦！仲有三分鐘。紐卡素博老命想反撲，但係個勢都唔在你呢邊，回天乏術，就咁完場。阿叔終於收錢啦。

跟住磨下磨下，三點鐘再眠。。。醒來去廁所，五點。十五十六，再眠呢？還是去早茶呢？都係再眠。再醒來時，一天光晒，已經七點。去茶居開壺普洱，叫盅煎蛋牛肉飯。吊！牛肉落太多梳打粉，有苦味。

食完返屋企開個大，就上城門水塘行引水道。明明日以繼夜咁眠，點解都好似好疲乏咁？行到身水身汗，樽水都飲完，只好落老圍搭車回家。

感覺很累，今晚都唔煮飯啦。去買個兩送飯算啦。

以後，我就咁眠下眠下，賭下賭下，玩下玩下，過埋餘生就算勒。