要從手錶講起。早排隻智能手錶瓜左，就拎返隻舊錶出來戴。一隻電子錶，都用左卅年。每年都要換一次電池，每次都五，六十蚊，又少戴，於是就淘寶買電池自己換。廿幾蚊就有三粒，我真係知慳識儉。
另外還有兩隻機械錶，係老豆留畀我，都係六十年代出品，久不久就要拎出來，等佢活動活動。其中一隻，個錶冠鬆脫。以前都試過，去眾安街一間錶舖整過。本來打算自己照樣胡蘆去修理。但諮詢過一個朋友，佢話有一定風險，和工具有特別的要求，如果係貴錶就唔好攪勒。咁我就決定搵日，再拎去眾安街整啦！
如此這般，平時我就戴隻電子錶。但上星期，無端端就停左。心諗，換電三個月咋，點會咁快。又再換電，但又係行行下就停。點解呢？一路試，試左幾日都係咁。
鏡頭一轉，去返星期一，行完山，心曠神怡。但係第二日，又試情緒發作。靜觀心念，覺得好似有人要害自己咁。見過鬼都怕黑，立即去買舒肝丸食。去之前要去飛髮。自從大頭文走左，就好抗拒飛髮。因為試過兩檔都不滿意。要忍無可忍，先肯勉強自己去飛。頭髮凌亂，自己都唔開胃，心情都差d .
經過眾安街，仆街勒，間錶行貼晒紙話光榮退休結業。立即入去問下，做到月尾。咁就唔拖得勒，要快快整錶勒。
返屋企就立即食藥，果然，當晚就見效。心情好轉，立即就諗食。唔，今日買了白菜仔，屋企有菜乾陳腎，煲個金銀菜陳腎湯丫。明天係初二，買舊腩肉，拜完地主就煲湯，完美安排，我簡直係天才。
第二朝一早就去街市，買齊料就返歸開工，浸浸洗洗，覺得自己好有成就。工序都多架，但係自食其果，冇人搶得走我煲湯，就心甘情願啦！
用電磁爐大火煲卅分鐘，再轉落電子瓦撐慢煮，咁就可以去眠勒。到醒來時已經五點，湯成。享受成果，係最佳回報。呢排天氣乾燥，成日口乾口苦，飲呢個湯，潤肺清肺熱，無得頂。食埋湯渣，飯都唔駛食。
肺與大腸相表裏，潤完肺，第二朝就拉了一大堆，感覺舒暢無比。早餐飲埋剩下的湯，功得圓滿。跟著拎隻電子錶來攪，詳情唔講了，經過幾日思考，想到一個可能性，整完就要測試一下，等佢行下先。咁我又走去眠。
醒來已經三點幾，隻電子錶仍在運作。咁就拎隻機械錶去眾安街整。師傅一睇，話內裏好污糟，清理連埋修理錶冠，六百啦！嘩，好銀貴。咁人地係專業，又退休咯，畀人賺啦！擺低隻錶，三日後再來。
講左咁耐，係咪好煩呢？仲未完呀！明天一早，仲要去洗衫，否則要著Speedo。
沒有留言:
發佈留言