心滿意足

星期日收工回來，隊下啤，依計劃進行清雪櫃行動，煮左個蕃茄蛋食，然後就去眠。　醒來後又跑下馬，有攻有守，到第九場，買左２，４，１０位置Ｑ鐵角。去到最後五十米，４號帶出，２號外欄殺上，哇哇哇，ＹＥＳ！叫到拆天，中大冷位置Ｑ呀！

到公佈派彩時，咦！咦！乜野呀！？４，３咩？吓！唔係４，２咩？吊！老眼昏花，睇錯左添。醜死鬼囉。頭先叫得咁大聲，好在冇人見。不過唔緊要啦，當時興奮的心情，和真係中獎的感覺無異，確確實實興奮過，咁就大有得著啦。中果一千幾百，猶如垃圾，洗半日都洗晒。正所謂千金易得，興奮難求。講到好似幾億元未開頭咁。。。做人唔好咁認真，一切都係夢幻泡影啫。

之後又行行企企，到晚上九點幾，考慮好唔好睇明珠９３０，都係唔好勒，再去眠啦。呢排都好疲累，早睡有著數。

睡到自然醒，個天仍未亮。好驚醒來原來只係十一點。因為通常睡兩小時就要去夜尿。睇下個鐘，嘩！發達啦！原來已經五點。今晚訓到本利歸還啦。

落街早茶。途中遇到神算大媽。佢在粥舖工作，一檯客四人，落柯打落到烏厘單刀，佢都記得一清二楚，睇數仲利害，望兩望就計到出來。有次我專登用個身遮住佢視線，佢都講得出幾錢，快而準。應該係一早計定。

佢話佢工作的粥舖生意慘淡，朝早八，九點，應該係黃金時段，都係小貓三，兩隻。又講到附近間士多，老闆娘要賣盤。嘩！咁大鑊？士多就係有隻貓叫王寶強那間，咁王寶強就快見唔到了。

都理唔到咁多，一眾高官收幾十萬一個月，佢地都唔理，我理來托柒咩。飲我的早茶去。飲下茶，食個雞絲粉卷，又飲下茶，覺得急屎，就埋單走人。返屋企擺低兩磅，就出發去行山。上到引水道都只係七點，天氣清涼，風頗大。行得很愜意。可能我平時去得遲，有些熟人都見唔到。今日見返，打個招呼，喂！原來你仲響度呀！

大半個月冇行山，今日再來，真係要謝天謝地。雖然我的足底筋膜炎仍然困擾，都行得好開心，夫復何求。感謝城門水塘。