追

人世間太多醜惡的人和事，不過都間中有人攪些美好的event。好似呢個Symphony under the stars。

大家記得十月卅日早上十點，就上網去搶飛。

曲目我就識條柒，因為指揮係譚盾，電影臥虎藏龍個配樂，贏左奧斯卡，不我我就唔識欣賞勒。不過呢～～～最後兩支，係ＢＯＬＥＲＯ，和１８１２序曲，再加煙火表演。大家一定聽過，應該有個好滿意的結局。　

＝＝＝

最近行行下街，路邊有架單車，有點奇怪，係用磁漆髹過。令我想起幾十年前的一件事。當時仲係小學六年級，早會上，大家唱完聖詩，阿訓導主任上台講野。叫大家唔好郁。跟住有個大媽出來，四圍超，然後指住我班中一個平時十分沉默寡言的同學，係佢勒。　

呢個同學，換了今日，可能納入ＳＥＮ，或者叫自閉症。

原來大媽係附近開單車租賃，有人用本校的手冊作證件去租車，有去冇回頭。因此走來捉賊。

長話短說，自閉仔根本冇做過，但係有理說不清。當時係一間公屋小學，同學大都是屋邨子弟。有個同學，發現同層有個校友，同級唔同班，突然在屋邨走廊，用磁漆去髹一架單車。走去報串，將呢條友繩之於法。自閉仔沉冤得雪，訓導主任在某日早會出來宣報件事，仲要單車舖大媽當眾送上茶錢，向自閉仔和佢老母道歉。

事隔幾十年，想返起，我睇的重點在，呢條友當時十歲左右，就曉得咁策劃，假手冊，之後將贓物易容，真係天生犯罪狂。　

咁之後點，我就唔知啦，作案人係乜水，我都唔知。不過現在的我，認為佢之後長大，一定係將犯罪基因，發揮得天衣無縫。

＝＝＝

成日有人問，人性本善，或性本惡呢？　即係話：性本善，不過有人因後天遭遇，變成惡。相反亦然。

我話既，有人生出來就善，有人生出來就惡。後天只會令佢更惡或冇咁惡。

＝＝＝

有人話：畜牲始終係畜牲。但係我話畜牲有比人更善良的。

食神唔駛講，我講左好多。連食神細妹，都係好善良，好有愛。食神走後，食神細妹原本雲遊四海，好日都唔在天台出現。但係食神走後，佢就長駐天台，不時長嗚，搜尋食神，為時起碼兩年。

＝＝＝

所以，做一個人，如果你係天生惡種，咁就在此世間如魚得水。如果你心存善種，咁只有不斷追求美好事物，避開醜惡的人和事。

去聽下音樂會啦～～～