都係慳返啖氣

家陣雖然冇乜人寄信，但係仲有Ｄ銀行呀，強積金呀，久唔久就寄信來。有時真係話唔埋，法庭話要你去做陪審員，咁就寄掛號來。所以都要睇睇個信箱。

負責我家大廈的郵差哥哥，就真係麻麻地。大門入口，有一個箱，如有派錯信，大家就掉落去，等其他人認領。我都試過幾次，在其中找到我的信。最近幾個月，就有一封保險公司的信，放錯落我信箱。一個月，兩個月，三個月，我開始留意到，原來係同一條街，雙數門牌的信。而我的大廈，係單數門牌。即係話，郵差哥哥，派左對面馬路的信落我信箱。一次，兩次，三次。

我試過將信攝在大門鐵閘罅，希望郵差睇到，派返過對面街。但係今日攝完，第二日，佢又派返落我信箱。試過幾次都係咁。

我最關心係，你可以將對面馬路的信，派錯落我信箱，咁當然有可能派錯我的信去人地信箱。

咁，我就打算，寫張字條，用最客氣最婉轉的話語，提提郵差哥哥，留心，注意門牌號碼，唔好派錯啦～～～

亦都想過，直接寫信去郵局方面去投訴。。。

但係思前想後，慳返啖氣啦。

＝＝＝

都係管好自己罷啦。

＝＝＝

大家有冇留意，去買包裝鹽，幼鹽係叫餐桌鹽？聞說係加左其他物質，令佢質地幼細，容易灑在食物上。白胡椒粉呢？又係加左料。

我食得平，不過食得招積。所以我在淘寶買了調料瓶，擰擰擰，就將黑，白胡椒粒，或者粗鹽磨碎，加入食材作調味。咁就食少Ｄ雜質。

＝＝＝

沖涼都有學問。人體有個淋巴系統，好似血管咁，但係就冇個心臟去推動淋巴液，要靠人體活動來運作。沖涼時，如果用個擦，去擦一些鬼崇位，就可以幫助淋巴液流通，功效好顯著。

＝＝＝

買菜搭棵蔥，但係蔥點樣保留呢？最初用水養住，就保存到三，幾日。但係近來，唔知點解，即日就變得又黃又霉。終於被我搵到方法。就係第一時間洗佢老母，然後印乾水。切段或切粒，因應你需要。然後放入玻璃食物盒，再入雪櫃。咁就放好耐勒。

＝＝＝

各家自掃門前雪，唔係冷漠，係免卻麻煩。

我以前提過，前公司搵笨實，出唔足糧，和同事講，冇人認同，係佢地連基本算術都未能掌握。上網爆料，仲被人亂作，話我係貪錢，貪多幾十蚊人工，去跟蛇頭。你以為可以幫人，但係人地唔值得幫，熱臉貼上冷屁股。

橋頭倒涼茶，河苦（何苦）呢？