67

唔係想講鬼子佬新一代流行的67，而係呢兩日，六號，七號發生的事。

有個叫積金易的平台，只要你登記左，就可以一個app睇晒你在不同金融機構的強積金戶口。之前都聽說過，廢到仆街，但係大勢所趨，都係要跟。我的用家經驗，真係吊佢都嘥鳩氣。

咁我最多強積金供款係某某公司，佢要十一月六日先聯上呢個平台。當日一早，得閒無事等收工，就開個app睇下。嘿，真係準時，已經睇到。最火滾係睇到佢蝕左我幾多錢。我真係命苦。

收工返到屋企，又得閒無事，就搵野攪。事緣我有部舊手機，舊電池老化發漲，迫爆外壳。咁我上網睇下有冇換電池教學，點知真係搵到，看似不太難，咁就淘寶買電池啦！只係羊28.8，九月就收左貨，到今日先動手。

長話短說。做人真係要量力而為。唔好高估自己能力，或低估事情的難度。

幾經波折，去到移除電池一步。有阻力，咁我就加大力度。臨近甩開一刻，舊電池竟然噴火。嚇撚死我。

急急將電池掉落地，打開雪櫃，開罐啤酒淋熄佢。燒成咁樣。。。

真係嚇到魂魄唔齊。

事後回想，唔應該用啤酒救火，因為少左兩啖，飲起來唔夠喉。

===

到七號，係我先前提到的音樂會公佈門票分配的日期。一大清早，就上網查看。吊丫，冇我份。

當日我都有懷疑，到底個機制係點。又話first come first served，又話ballot，你老母有冇讀過書架？唉！又係吊佢都嘥氣。

好啦！塵埃落定，唔駛煩請假。又攪部舊手機。今次我醒啦，開定啤酒待命，有乜依郁就淋佢。都算順利，裝好就充電，再測試廿四小時，明天都冇事就嵌埋佢。

===

做人都係要有自知之明，以後都係多煮飯，少魯莽行事。