慳左當賺左

早前講到，有隻老爺手表，粒的鬆左，拎去整，花左我六百大元。粒的鬆左，有個危機，就係跌左搵唔返，咁隻表就廢左大半。另一方面係紀念價值，要盡能力去保留。

最後財散人安樂，修理得好滿意，現在放下了心。

＝＝＝

但係另外一隻電子石英表呢，我大概係1996年買，當時售價不到一千元，都成卅年，最近行下停下，試來試去都攪佢唔掂。

我都打定輸數，又唔係名貴，又咁長時日，我聽人講，石英表行得就好地地，但一壞就冇得整。大不了就放響處擺囉。但係電子野，乜都有得整，只看你有冇本事。

幾十年前，已經聽人講，石英表芯係平到斷磅秤。咁淘寶乜都有，搵返個表芯，換落去咪得囉。於是就踏上呢條不歸路。

＝＝＝

但係要買野，你都要講得出你要買乜野先得架。咁就要一番功夫。

首先，粒＂的＂，原來叫 watch crown ,把頭，佢連住一條野，叫stem，把杆。成件核心部份叫quartz movement，caliber  ，機芯。

機芯在地球上有四大生產商。ETA，係Swatch旗下公司；Ronda，呢兩間都係瑞士公司；跟住就係兩間日本公司：Miyota，係Citizen旗下，和Seiko。

咁你點知用邊隻牌子呢？咁就要拆開隻表來睇。哦！原來係Ronda。乜野型號呢？又要慢慢搵。都唔緊要，只要搵到個合大小的咪得囉。

睇睇下，乜個度量衡標誌咁怪？通常尺寸就係’和＂，點解係’’’，再查下，原來係法國傳統單位Ligne，即係2.256mm。嘩，大佬，駛唔駛咁複雜呀。　

跟住就睇電池，又大把學問，縮窄到button鈕扣電池，有No.371，但去買就買SR920W 。呢個次要，唔好鑽咁深了。

＝＝＝

唉，今日我受夠了，睇住咁多先。明天再睇。