星期三，真係的起心肝落手做。上網睇教學視頻，知道最重要是唔好刮花錶面。但係始終是業餘人仕，還是刮花少少。個機芯赤裸裸在眼前，但係冇標明型號。唯有上官網查詢。嘿，又幾好喎，三兩手勢就搵到，對比尺寸和圖片，確認了型號，就上淘寶搵，羊65 ，比日本貨貴，佢話係瑞士原廠，是但啦，買！
好有滿足感。乘勝追擊。早前舊手機換電池，聯想到部筆電，會唔會換左舊電池就得呢？當時係黑仔期，掂乜衰乜，曾經修理廁所燈，傻傻地，攪到烏燈黑火好一段日子。後來冷靜下來，再次確認係接線出問題，先至重見天日。
於是拎部筆電出來，拆開佢，睇下電池型號。點知幾粒螺絲擰極都擰唔開。嘿，上次冇問題架喎。想了一輪，決定用熱溶膠滴在螺絲上，等佢凝固，咁咪有著力點囉。辦妥後就係等。
傍晚食完飯睇新聞，嘩吊！ 大埔燒成咁。。。通常火警，都係一個單位，頂多漫延左右一兩個。現在係幾幢樓，由底到頂咁燒，好撚恐佈。當時已經有一個消防員殉職。成晚不停睇住更新，死亡人數不斷攀升。到第二日，已經四十幾人死亡。已經超越嘉利大廈事件。
記得十年前左右，九龍灣迷你倉大火，非常慘烈，亦有一個消防員犠牲。碰巧係我中學校友，舊生會發起籌款活動幫助其家人。其他方面幫唔到，唯有盡少少棉力。今次，亦都只可以咁做。
星期四，約左老同學飲茶行山。講下近況，又講到老男人朦鳩查查冇記性。我話： 好囉！你唔煙唔酒都係咁，我就放心繼續煙酒咯！如此過了一個愉快的上午。
火災繼續成為新聞頭條，死亡人數一路上升。網路上各平台有尋人啟示。好心你班記者就唔好訪問人啦！人地家人被困火場，凶多吉少，唔好騷擾人啦！
星期五，拎部筆電出來，經過少少波折，終於攪定。拆除舊電池，上淘寶落單，羊45 ，希望可以救活。
心情大好。對人生的盼望和希冀，就係等快遞。到呢個時候，又要想飲食。上星期臨時決定打邊爐，擾亂了節奏，如今雪櫃內有一個薯仔，半個洋蔥，一條甘筍。最佳策略就係買兩隻雞腿整咖喱雞，咁就清晒貨勒。我真係聰明無敵。
呢個時候電話響，係86 字頭，即係國內打來。好奇之下接聽了。對方講普通話，講得出我名，問我係咪申請旅行社牌照。我話吊你啦！佢又講出我身份證號碼和出生日期。仆街勒，好危險喎。我唯有抛佢浪頭，用我的潮州普通話講，你想騙我多少錢，直接講。
佢話唔係呀！你托你堂弟乜乜乜來申請牌照嘛，我讓他和你說。跟住就搵第二條友同我講。條友一來就，哥呀！對對對，沒問題的，我會替你辦好的。。。
想大石責死蟹？ 講多無謂，立即吊佢老母臭花蟹，然後收線。佢仍不停打來。我block 完佢又用第二個號碼手機打，再block 埋先得清靜。
呢個時候真係好驚恐。上群組問其他人意見。其中一人輕鬆的講，冇野既，電訊公司賣你資料囉！
我最怕佢冒我名借大耳窿，咁就一身蟻勒。成日心驚膽跳，食不知味。返到公司，就和同事講，佢話，碎料啦！我地呢處人人都試過，有晒資料又點，照吊死佢囉！
到呢個時候，個心先定返。
唉！老人家，唔可以情緒大起大落架。。。
所以下次呢啲9588 嘅電話, 唔好貪玩接聽啦! 唔聽咪唔駛之後驚囉! 哈哈!
回覆刪除