懨悶

呢輪個人好冇活力，乜都提唔起勁。

剛過去的星期六係天后誕，走左入元朗趁熱鬧。其實係自己迫自己去，雖然搭港鐵只係兩個站，都覺得好似千山萬水咁。入到去，係人頭湧湧，鑼鼓聲拆天，人人都好興奮咁拍照，但係覺得好冇趣，行左一陣就返屋企。

星期日，迫自己入西貢行下。又係無無聊聊行一個鐘頭，就搭車返歸。

今日，迫自己去飛髮。因為大頭文走左之後，每次飛髮都好唔情願，因為冇一個飛髮佬合心水。

飛完髮，經過圖書館，又迫自己入去行下。疫情期間冇得去，之後去過一次，裝修中，到如今，可能有成五年冇去過。裝修完，多左唔知幾層，行到腳軟。發覺已經冇興趣睇書，行一圈就走。

早兩日又開部CD機來聽。好奇怪，音質好似比以前好。唔通係我聽覺有問題？不過，又係聽兩隻碟就冇心機聽。。。

唔通好似某某講，乜都有配額，看書，聽音樂的配額都用完了？

某次和朋友傾開，佢話佢有定期去游水。嘿？讀書時期，都冇乜見佢游水喎。轉頭想，我只係在高中的幾年間比較多游水，之後，條事必度只係在冇洗衫冇底褲時才會著。又係配額用盡？

唉！人生好苦悶呀！