食神老豆走了

今朝收工，返家時遇到食神老母，得知食神老豆走了。上海婆講廣府話，真係聽唔到幾多，只聽到末​尾階段，佢骨痛到想跳樓死。

唉！解脫了。大概係去年初得知佢有病，到今年已經不似人形，不如早早離去。

相識廿年，見佢平時都樂於助人。樓梯的光管，一有燒左，都係佢出手維修。之前未有事，佢仲主動換晒慳電膽。

最感激，就係為我帶來食神。本來我都唔喜歡狗勾，係食神咁熱情，第一次見面就溶化了我，才有了之後十年的相陪。

下次去竹林禪院，幫佢唸下經啦。

柒未完

話說八月最後一個星期日剷了牆，個多星期來，雖然慢，但係都有進展。我睇返我遠古時候淘返來的牆灰，睇真紀錄，原來係補牆補洞用的，嘿！唔緊要，因為真係有幾忽窿窿要補，咁又攪左場大龍鳳，補好洞洞。

又另外一桶，我以為係牆灰的，叫瑪拉彩石塗料，原來係替代牆灰和油漆的。我真係柒下柒下，成日買錯野。

＝＝＝

上星期中，因為個水壺漏水，滴濕左個鍵盤，有幾個鍵失靈，咁橋其中一個鍵，係登入電腦的密碼中的一個字，即係眼光光，用唔到電腦。睇返紀錄，又係淘左三年的貨仔，個滑鼠呢排都開始怪怪地，係時候破費了。於是上淘寶搵左個，原來現在連鍵盤滑鼠都有充電版，咁就唔駛煩換電池，專心煩叉電啦。

同時，我的剷牆批灰大計之中，其中一個願景，就係在窗口搭個架，種幾盤花。上開淘寶，就搵埋盤栽泥、和花盤仔啦。星期一收到貨，鍵盤好合心水。但係花盤仔，比潮州功夫茶杯大不了多少。下單時，明明我睇清楚尺寸，拎把尺比量，都似乎好合適，但係實物一來到，尺寸又冇錯喎，但係原來係咁細。又柒一次。

＝＝＝

剛過去的星期日，馬季開鑼，當然要參與。一早就買份報紙返來刨。望兩望，就信心滿滿，７，８，９，１０場，下注一條四穿十一位置Q過關，然後走去訓。醒來已經跑完第一場。接著買兩場輸兩場，吊！等最後幾場啦。結果，當然係輸仆街啦。。。唔緊要，我等資深馬迷，不經一番寒徹骨，那得梅花撲鼻香。

＝＝＝

老坑的其中一個大患，就係鬼鬼鼠鼠，無端端會陰陰濕濕咁痛。最近，我個右膝就係咁。又唔係痛到要睇醫生或者食止痛藥，但係就是不爽。最仆街係唔知乜事，係自己不小心弄傷？為何會痛？

患難有時會生智慧，但係大前提係個人，要聰明無敵，例如：我。好似呢種看似無緣無故的痛，點樣查找原因呢？膝蓋痛，你就做各種的動作，邊一個動作會另患處最痛，就係痛因。

某日，開工時帶薪拉屎，蹲下去，就覺得個膝頭哥痛。哦！想起來了，早前一次屙屎，蹲久了，起來時呵一聲，一躍而起，一定係發力過急，傷了肌肉，或者筋腱。老人家，不要急，乜撚野都要慢動作呀。

＝＝＝

盂蘭盆節，荃灣區總係排到最後，昨日才開始。今日中午醒來，見天氣睛朗，有風又不太熱，就落去趁下熱鬧。去到剛巧做緊日場，鑼鼓震天。但係睇大戲的人不多。本區的潮州勢力，近年已被福建取代。好似我平時買煙仔的士多舖，都係福建的，早兩個月，佢地仲開多一間分店。

去趁呢個墟的其中一個節目，就係睇下捐款人名單和捐款數目。有某幾間寶號，年年都係大戶。好似某士多，今年就捐左一萬六千八。你睇佢陳陳舊舊，附近又多便利店，但其實食力還在。再睇下，某藥房，某食肆，仍然慷慨。

＝＝＝

起承轉合，又回到剷牆批灰。將兩小桶錯買來的物料，批了上牆，告訴自己，你真係錯有錯著呀！望住幅牆，有一種快樂的感覺由心發出來。摸一摸幅牆，牆面的物料堅過石堅。尤其是將兩桶物料用完，將空的器皿掉佢老母落垃圾站的收集箱，特別興奮。好似完成萬世偉業。

不用急，我慢慢享受呢個過程。等我享受夠，我就真係批灰。我真係批呀！拿！我真係批架！唔係流架！

不過，我幾時做，唔知呢。。。

而家，我要準備今晚的賽事了。拜拜。

怪夢

昨日上午收到訊息，一個中學同學走了。第一感覺係驚訝，佢唔似身體孱弱，話晒係跆拳道黑帶。咁早走左，有點意外。

第二就想到，報應不爽。中四開始認識，一段時間一齊玩。都好熟落下。不過出來工作之後，發覺條友縮骨算爆，唔熟唔食。朋友呢樣野，似乎對佢只分有冇著數。

佢仕途非常暢順，工作十幾年，已經入住淺水灣，隔兩年，又話住馬己仙峽道。咁我呢類窮人，自然開始疏遠，再無通訊，至今大約卅年了。

幾時的事，唔知。好在唔知，唔駛做帛金。

都唔理咁多，繼續我的裝修工程。

晚上開工，一如既往，有機會就偷雞訓覺。流晒口水，仲發夢添。

夢中去左之前個客的公司。就係零零年害到我雞毛鴨血的仆街。條仆街一見到我，就塞了一疊五十蚊紙過我。我粗略一數，大約萬零蚊。心諗，你累我蝕的，豈止一萬。

呢個時候，我個死鬼同學就出現，仲和仆街客熱情寒喧。一輪交流之後，佢望見我，就好熱情咁叫我個名，過來握手。我心諗，你唔係死撚左咩？

到呢個時候，我就醒左。

大吉利是，夢見兩個仆街。唔知吉定凶。

步步進逼

過去的幾天。。。

星期日，略略眠一眠之後，下午就開工剷牆。個漆剷很久之前已經買左，耐到唔記得幾時咯。但係我曾在淘寶買過補牆物料，翻查紀錄，係2023/12/30，個剷應該都差不多時間。但係又有紀錄，2022/01/18，買了泡劑填充物。即係2021年已經塌石屎。即係再早，幅牆已經撲起。。。

咁，我即係起碼拖左五年。唉！算了算了，當時點解咁頹，現在都無從稽考了。個人濛鳩查查，做乜都不明不白，只好現在做返啦！

剷呀剷，唔得，戴口罩先。一個鐘？兩個鐘？好撚大工程。汗流浹背，底褲都濕晒。得出一個結論，唔夠料去補牆。但係呢日已經做到仆街，要收工了。快快清場，掃了一大袋的灰，做死阿叔了。

星期一，凌晨就去自助洗衫，攪完又回家一休。醒來去早茶，然後上城門行了一轉。

回程去五金舖買批牆灰，$58,5公斤，應該夠卦。今日已經好操勞了。

星期二，收工時和同事講起，好想搵路去葵涌道茘景對開的巴士站。個同事老到濛鳩查查，佢話，咁咁咁。。。咪有43號車囉！

我知條友信唔過，完全雞同鴨講。但係當探索一下附近環境啦。結果呢，我想搵東面的車站，佢就教我去西面。最後花了成個鐘先返到屋企。在戴麟趾下車，咁就去棠記，食碗$27性價比超高的雲吞麵啦。之後經過禾笛街，呢檔賣雞蛋賣到電視台都報導，咁多年都未幫襯過，又試下。$21半排湖北蛋，係平，不過似乎比印象中的細隻。

回家前又去五金舖買了灰池，$8。今日冇心情。乜都唔做。但係，我望向地下，我見到屋企東南角的地下了。多少年，地面係混亂凌亂，好似亂葬崗咁，堆滿雜物，垃圾。如今，理順了。靜靜望著地下，我的思緒都好似清晰了。一切都開始美好了。

星期三，即係今朝，收工時諗，昨日都戇鳩左，不如徹底戇鳩，誓要搵到條路，去葵涌道的茘景巴士站。終於，我找到了。

我以為呢個站咁騎呢，冇乜人落車，原來呀，好撚多人落架。

搵到個站，十分開心。以後可以搭巴士上下班了，不用搭港鐵了。

我好撚憎搭港鐵，有得揀，一定唔搭。因為港鐵又迫，每逢夏天，個個大汗，座椅係不鏽鋼，呢個起身，位上留有個袋印或夾印，點坐呀！

六月開始在此場上班，到九月先搵到條路，叔叔真係老了。

回家途中買定食材，打算今晚做個焗豬排飯。準備好食材，再望向幅牆，唏，等下午訓醒再算啦！年紀大，每天做一點，才不會一曝十寒。

我知道，我肯定，一定會愈來愈好。

食得多、病得多

之前話大孖瘡爆發，靜下來一想，可能和兩星期前老同學聚會的晚餐有關。

當晚係去食潮州菜，餐前小食係鵝膝，第一道上的菜，係鵝片、鵝肝、鵝腸。鵝肝真係入口即溶，好肥美。第二道係紙包蝦，有個同學話佢皮膚問題，唔食。

我就乜撚都食入口。結果好快就爆瘡，另加皮膚痕癢。開頭我用茶樹油去對付，都有些效果，但係似乎效力有限，隔幾日只好去買西藥。才慢慢有好轉。

回想起幾年前脂溢性皮膚炎，真係心驚膽跳。當時攪左好耐先叫好返。但係一年內每當我唔記得戒口，唔覺意食到蝦，或者鵝，頭皮都會發癢。到近兩年，食蝦已經冇問題，點知今次食鵝，仲要由外食到內，可能係咁，加上呢輪天氣悶熱，暑毒盛極，咁就乜都爆發出來。

我睇都要去食盅龜苓膠，清下血毒先得勒。

休息日

今晚終於休息了。呢排天氣好翳焗，個人好攰。又係冇乜建樹。不過昨日終於都執拾好一個膠箱，掉棄一些廢物。每次丟掉一些積存不知幾耐的物品，個心好似輕省一點，又好似好有成就。不如一把火燒鳩晒所有野，可能飄飄欲仙。

今朝放工時，原本打算去食完早餐，返歸就立即剷牆、敏灰。但係返到來，實在太累，唔想郁。只好上下網四圍遊。

呢排都好多怪新聞，美國個傻佬就唔好理佢啦，都唔係第一次，將個湖改名，又有乜作用呢？啋佢就將自己降到同佢一個維度，何必咁傻呢？

泥石流呢單就大撚鑊啦，睇見都驚。但係人類除了破壞，又可以做乜？

另一單就係個阿婆掌摑個細路女，打到成個跌落地。之前有乜恩怨就睇唔到，不過我估商場CCTV會映到全部既。

網民的反應好得意，因為個阿婆個女被起底，係做保險既，就有好多人話要CUT既呢間保險公司既保單。如果我話你聽，你CUT單，你損失係大過保險公司，或者呢個保險經紀，你仲會唔會做？

又有人，因為被摑女童和佢老母係內地人，有一個本地男子出面指摘打人的阿婆和佢個保險女，就話香港人專係奉承大陸人，對付自己香港人。如果換左被摑的係美國女童，咁又會點呢？係南亞藉？係非洲藉？又會點呢？

所以呢，最好都係保持自己內心的寧靜，係都唔吊佢。得閒勤拂拭，何處惹塵埃～～～

回氣再上

上星期真係好操勞，星期六不得不休息一下。煮下飯仔，悠下悠下咁過。星期日更是日以繼夜咁眠，眠到星期一，連每週城門水塘都冇去到。

總算抖返夠本。今個星期又要再努力了。

最近好多狗事。先係早前揭揚有幾條細路放火燒狗，攪到人神共憤。網上各種毒咒出齊，好似要班細路死無葬身之地咁。

跟住，又有大狗連環咬死兩隻細狗。網民又話唔應夠人道隻狗，係狗主的錯。

嘿！立即又來一個高高超高潮，有狗咬死人。隻狗有鬥牛梗血統，點解會存在香港呢？

好多事，都冇得問點解。你要問，只會令自己覺得自己係受害者，永遠被困。不如諗下，萬一被惡犬襲擊，點樣自救。

網上睇過資料，狗咬人，最大問題係咬住唔放，瘋狂地係咁拖你甩你。如果係大狗，係絕對可以咬斷骨頭。如果你被咬住，點樣可以令佢鬆口呢？

一，用火燒佢個鼻。二，插佢菊花。

利申，只係睇返來的，未經證實。但係如果真係咁唔好彩，只好一試。

講來講去，都係睇你好唔好彩。一唔好彩，遇著個人形癲狗，你仲麻煩。方法都係一樣，燒佢個鼻，插佢屎眼。