今朝訓到成九點半至醒。依然口乾，洗個臉就落去茶居飲茶。廚房去到半休眠狀態，只有一個爐在蒸，所以一出貨就點左兩個點心。假期最後一曰食好D啦，埋單六十一元。
個人情緒狀態唔多好，決定四圍行下。去到體育館，順手用WIFI更新手機軟件啦。坐坐下，個肚又作妖。心大心細，在體育館攪掂，定馬上回家呢？都係就地解決啦。
之後又四圍行。不如今日遊車河啦。於是上巴士去大埔。走去文武二帝廟走左一轉，然後就搭巴士過元朗。呢條路行左幾十年，每次個人悶悶地就會咁樣走一轉。但係今次真濕滯，巴士行到錦田，個肚又作怪。大佬，星期日到現在，日日屙，有冇攪錯呀。
去到形點，都冇心機行，搵廁所解決先。富貴商場就有富貴廁所，都幾乾淨，去得放心。
攪掂都無心戀戰，搭車走啦。
＝＝＝
昨日一個老同學在群組內貼文，話說佢有個富貴無線吸塵機，個火牛條線在接駁位披左口，問原廠客服，話呢個係正常損耗，保養唔包，要買過個火牛，盛惠四百元正。佢話要去消委會投訴。
我心諗，你係咪咁刁民呀？呢種問題，當然唔包啦！有人叫佢去鴨寮街配返個，四十蚊攪掂。最後佢同個客服交涉，對方話畀個特價，二百八啦。佢因為慳了百二蚊沾沾自喜。
真係抵我窮死一世。人地咁先係撈丫嘛。開天殺價四百，如果你傻鳩鳩磅水，咁就笑住袋。如果麻麻煩煩，咁就減少少，個客開心，佢依然賺到笑。想清楚丫，兩百八蚊一個火牛？買隻水牛都得啦。
總之，人老左九成都變得濛鳩查查，若要開開心心活下去，千祈唔好認真，更加唔好多說話。
今朝一早就起身，沖茶飲，等屎屙。然後出去食個早餐，就出發往西貢北潭涌。九點到達，往東壩的小巴，竟然冇人排隊，咁就去東壩行下啦。
去到先醒起，現在行乜鬼預約制。咁，咪預約囉。鬼死咁麻煩，攪極攪唔掂。工作人員話：預約的人要入一次個人資料，親身去行的人又要入一次個人資料。我吊！咁撚笨實都有？火滾，唔鳩行啦！走人。有個工作人員真係唔化，問我得唔得閒幫佢填問卷，你都傻得可以，你幫我填晒極不滿意咪得囉。
原路行返出去。天氣實在很熱，冇幾耐就已經飲左半支水。打算點都頂到水上中心啦，但係叔叔不行了，過左北丫就搭小巴走。
＝＝＝
照原定計劃去花墟行下。出到去都成十二點，不如去第尾牛扒食午餐先啦。叫左個鐵板肉眼牛排。幾腍，味道調得幾好。但係有一刀切落去見少少血水喎，心諗牛肉唔怕啦。餐茶叫熱咖啡，唔熱喎，插隻手指落去都冇問題果隻。
食完就行金魚街。觀賞魚，蝦，水草，比人食的石斑，龍蝦，菜都要貴，仲可能買左返去，第二朝就反肚喎，點買得落手？
再過去花檔。真係花多眼亂。靚既唔平，平既唔靚。又空手而回。不如下次舊薑，蒜發芽就種落泥啦。
＝＝＝
天氣熱，個人都好累。都要返歸勒。上左車，個肚開始作怪。係牛扒？還是咖啡？愈近屋企個肚愈唔掂，臨到屋企，終於失守。
以後，都係唔出街食勒。更加莫講話去旅行，去到人家地方出事，醜死鬼咯。
昨日食過午餐，來個午睡，真係大滿足。
醒來無無聊聊，走去商場行下。行行下有個戴口罩女子走過來問：阿叔，打唔打流感疫苗呀？我話：打你老母。真奇怪，咁樣通街撩生意？
行過DONKI，睇下有乜野賣。最撚憎佢成日播住首歌，煩到嘔。見到有一PACK十罐的吞拿魚，只賣六十蚊。細細罐，不過用來做三文治應該剛好。六蚊一罐，都抵丫，就買來試試。
行過百貨公司的電器部，無幫襯，攪攪震。見到有個雪櫃，標價萬九蚊，我好想買呀！不過就算有錢買，屋企都冇地方擺。唔買都睇下啦，逐道門打開，呢格可以擺啤酒，呢格放鮑蔘翅肚。。。我真係貪慕虛榮。又睇下電飯煲，新出一隻零塗層，IH，千五蚊。好多年前，聽食神老母講，食神老豆買左個四千蚊既電飯煲，煮出來的飯，粒粒分明，好好食。聽完之後，好嚮往。其實唔係貴，你一日煮兩次飯，一年就七百幾次，用廿年，平均一次幾毫子，但係有碗靚飯食，乜都抵啦。你去酒樓食，一碗收你十蚊，吊佢啦。
同樣邏輯，我買茶葉都好捨得。現在去開的茶居，茶錢九蚊一位。吊佢啦。我去買八十蚊四兩的普洱，夠我日日飲兩個月啦。
我窮，但係我食得招積。鹽，胡椒和黑椒，我係用即磨的，一來有型，二來味道真係好D。
照呢個思路行，雞蛋都應該食好D。你去茶記食早餐，隻雞蛋佢算你幾錢呢？我估最少都三蚊。係咪應該吊佢老味呢？我現在買開的泰國蛋廿蚊十五隻，一個三毫三一隻。於是我就去一田超市睇睇，熊本雞蛋做特價，四十四蚊廿隻，另一款話特濃的日本蛋，就卅六蚊十隻。好、下次就試下先得。
久不久行一次商場，最大變動都係食肆執完又開，執完又開。最令我不解係屋企附近最近開了一間日式拉麵，一開張就排晒隊，日日如是。上網查，好似屯門都有一間，好似話好出名。但係關人鬼事，過百蚊一碗拉麵，我就唔會試。
天氣好熱，行到一身臭汗，買埋啤酒返屋企隊。飲左兩罐，借住酒意，的起心肝，又批牆。終於將剩餘的一公斤批完。外行就係外行，批到核核突突。不過算啦，最緊要係唔再有灰不停飄落，心滿意足了。收拾好個殘局，好大滿足感。下一步就係抹好窗，然後出花墟買小盆栽，擺一個花陣。
＝＝＝
今朝醒來，都唔知做乜好。結果食完早餐，又走去訓。到中午醒，出去狗商場行行啦。天氣好熱，好乾燥。快快趣走入商場。場中大多係細狗，嘈到死。坐左一陣，去第二個場行。有個唔知乜節目，有班人打匹克球，似乎係藝人哥仔姐仔，個個姐手姐腳。女的著得密密實實，無乜睇頭。跟住走過體育館，志在量體重和血壓。７９KG，１４２／７９，都可以啦。
又行返入商場，一間本來是賣電器的，現在賣玩具模型。乜鬼閃卡，陀螺，我知條柒。連高達都唔係我個年代啦。一盒模型就幾舊水，真係好過搶。
＝＝＝
因為董伯伯離世，攪到我好悲傷，因為賽馬取消。明天星期日，做乜好呢？
好耐冇去西貢、不如明天一早就去。回程就去花墟買花，嘩！想起都興奮。
