沖茶飲左一輪，唔覺肚餓，但係有意思開大喎。昨日下午屙鑊勁，夜晚冇食飯，竟然仲有得屙？似乎可以肯定，昨日係食物中毒了。而家D食肆，或者講，班打工仔，做事真係馬虎。不得不吊佢老母。
可能係肚仔唔舒服，今朝情緒好低落。點好呢？索性唔食野，餓下佢，走上水塘行下啦。
城門永遠唔會令人失望，雖然天氣幾熱，但係一見到綠樹成蔭，個心當堂輕省左。都唔係講笑，真係行到成身濕晒，一樽蒸餾水，全部飲晒。冇水就散水啦。經開老圍，就上圓玄學院拜下各位大神，祈求百邪不侵。
回程走去街市生菓檔，天津鴨梨當然靚啦呢個時節。十蚊四個，廿蚊十個。唔好貪，四個都隨時食唔完，買十蚊好勒。買完梨覺得肚餓，就去食碗雲吞麵。點知食食下，個肚又作動，昨日的事猶有餘悸，拿拿聲就擺駕回府。今次及時趕到，傾盤而下，呢次乜都清清楚楚勒卦？
＝＝＝
昨日又有一單狗咬人，懷疑係三隻狗襲擊一個女子，就此喪命。真係唏噓。食神老豆曾經講，畜牲始終係畜牲，所以養狗一早就要建立個關係，有規有矩，唔可以冇大冇細。
但係狗對狗又另一回事。有個朋友兩公婆帶狗出街，隻衰野無端白事見到有隻哥基，就係咁噬。結果賠左萬幾銀湯藥費。
總之，記住一樣野，狗勾發癲，就拎個火機燒佢菊花。
＝＝＝
前兩日經過圖書館，心血來潮，想借CD。原意係想搵The Rite of Spring，奈何搵唔到，就借左Beatles 的Let it be。
以前覺得Beatles散BAND好可惜。現在一把年紀，又有另一番睇法。每個人的創作力都有個高峰期，過後就會下降，勉強捱落去，盞獻世。早兩年話用AI整首Beatles歌，真係慘不忍睹。
倒不如好好欣賞已存在的，無謂概嘆失去了根本未出現的。若然唔散檔，又會作出乜野歌呢？你點知一定係好野？
＝＝＝
下午有事要過九龍灣，睇下有乜地方可以去遊玩先。
沒有留言:
發佈留言