肥豬肉

昨日烚了一大舊肥豬肉，本想切得靚靚，來個蒜泥白肉，但由於朝早花很多時間去換屎塔蓋，結果睡到過籠，起身就急急亂刀切一半，加埋娃娃菜，炒埋一碟，加豆瓣醬，都食到好滿足。

===

人老左，最緊要有自知之明。

有自信的人，知自己有乜能耐，有何不足，識就識，唔識就唔識，唔會扮晒魚蝦蟹，乜都認屎認屁。

實在太多人死要面，乜都扮叻。往往年紀愈大愈充大頭鬼，反而失禮死人。

見過一個看更阿伯，自製一張某屋苑的住客證，四圍同人講，自己係住客，但係粗製濫造，一眼就睇出係流。其實人人都知，佢份人工都唔夠交租。

另一個就話自己每個月收租都十萬，只因怕悶，才出來做看更阿伯。但人人都知佢為保住份工，過節送禮去巴結老細。

另一個老坑，話同老婆去長州，行到氣來氣喘。我好奇怪，長州有幾大，會行到咁。佢以為我睇唔起佢，不久，佢就話要去行大東山，睇芒草。我只好唔出聲。你行到我批個頭畀你坐。佢又成日話自己幾多路數，連殯儀之星都做埋。係你就唔駛捱夜，做到隻積咁啦！

另一個大家都識的太監陳，成日以為自己識好多野，四圍去抛書包，去考人，講個英文字考我，我識，問我南華經係乜，我識，連捉依因正寫係乜我都識。結果就自卑感發作，以後見親我就博命引經據典。

其實一把年紀，都就快死啦！仲搶住出醜，不如食多啖飯，夠數就兩腳一伸，唔再獻世，仲好啦！