隨心所欲

通常喉嚨痛，就一定跟手發病。今次不例外。昨日喉嚨冇痛亦冇咳，但係就流鼻水。今日變本加厲，要帶定卷廁紙返工。

晚餐食乜好呢？想左好耐都冇頭緒。見屋企有棵蔥，今日仲好靚仔，但難保明日就見到都唔開胃。點用好呢？

結果想出一個石破天驚的用法，就係買半隻雞，條蔥就自製薑蔥蓉。

咁樣做好似執條襪帶累身家，但係又有乜問題呢，全部食落肚，冇浪費丫。而且一般買來的薑蔥蓉，多數太鹹，甚至好重味精，自製好D。

再炒碟菜，晚餐食得開心，剩幾件雞胸肉，明早煲雞粥，十分期待。

自從踏入十一月，我就不停思考，下個月就登六，我的人生路應該如何走落去呢？

今日呢個動作，可算提供了一個方向。凡事唔好計較咁多，乜都要又平又靚又正，會好辛苦的。但又唔好求求其，好似d薑蔥，我切得好靚架，滾油一淋，咋一聲，幾香架。

你應該乜乜，你應該物物，呢類扮為你好的建議，如今我只會答，我吊你都仲得。