芥菜鹹蛋肉片湯

今朝食完南瓜排骨粥，眠了一下，又到買送時間。走入菜檔，乜撚都有，心大心細。最後買了芥菜和娃娃菜。跟手去豬肉榮處買左舊上肉，再去買隻鹹蛋。

處理食材都幾煩。芥菜都多泥，要浸一輪。豬皮有毛，要用防風火機去燒，鹹蛋有泥，刮到一地都係。

時間緊迫，要妥為安排。件上肉先割部分之瘦肉切片滾湯，其他連皮連肥的，稍後處置。

煲滾水，將薑片，芥菜梗，鹹蛋黃和肉片先落，咁上下才放菜葉，到最尾落鹹蛋白，好快就食得。用湯碗盛好，個煲就要用來烚件豬上肉，得一爐一煲，就係要用到盡。

加薑加蔥，係咁烚。同時間，我就開飯。呢個芥菜湯，就係冬天的味道。

食完飯，刷牙洗頭洗澡，咪咪麼麼，舊豬肉都烚左成個鐘。撈起放涼，再入雪櫃。打算明天做蒜泥白肉。今日買送用了卅七元，今晚食了的，頂多十二元。荃灣名物燒臘飯都要十八元，我真係知慳識儉，精打細算。而且明晚一餐都大致預備好。

===

行將退五登六，最擔心的，是老到濛鳩查查。上次打牌，一條友地詐，另一個直情自摸詐糊。我都打到陀陀擰，輸仆街。

老到濛鳩查查，最可怕的是自己唔知，咁又係，by definition，都濛鳩查查，又點知自己濛呢？

呢個問題好嚴重，因為會得罪人都唔知，人地話你就殘忍，唔話你又難忍。會做成關係緊張。我之前就遇到過幾條老野，激到我嘔血。你又唔可以吊鳩佢，因為佢都唔知自己做錯事，鬧完佢都唔會改，仲嬲你添。

所以呀！我以後一於乜都唔做乜都唔講，咁人地只會話呢條老坑冇用架啦，就死得架啦！咁起碼唔會嬲我，甚至或者可憐我，遷就我呢！