南瓜蒸排骨

今朝收工，行過菜檔，見有南瓜，好啦，今日煮南瓜蒸排骨，扣起小部份，明早煲南瓜排骨粥。其實南瓜冇乜味，但係老男人，要多吃蕃茄和南瓜，預防勝於治療。

我有個朋友，都係獨居，佢話一個人煮食好麻煩，煮完又要洗碗碟。佢住得高尚，唔似我落街就有得食，所以經常叫外賣，一次過叫兩餐，慳返運費。

我就愈來愈覺得，煮飯洗碗，真係好簡單容易。因為愈大年紀就愈覺得做人難。

好似經常在梯間丟垃圾的仆街，又試故態復萌。我都一早估到。自私的人，永遠自私，你捉到佢一次，佢以後就加倍小心，你就更難再捉到佢。

好似多年前認識一個死肥仔，每句說的話，都係車大炮。有次佢吹到要買個千呎單位，大約一千萬，問我地合唔合時機。有人當面就踢爆佢，即場幫佢計數，當你拎得出三成首期，其餘七百萬做廿年按揭，銀行唔收你利息，每個月就要供咁多咁多，即係你月薪起碼要咁多咁多，你字都唔識多隻，有冇咁高人工呀？

死肥仔當場老羞成怒，拍檯拍櫈。之後佢真係改進左，唔係變老實，而係車大炮車得更精細，更無賴。我估如果你再踢爆，佢就更精密，變成無懈可擊的炮神。

咁對呢種人，唯有避之則吉。你唔同佢對話，相信佢唔會叻到呃到你卦？

所以話，煮送，都係洗洗切切，今次煮得唔好，煮多兩次一定得。實在係易到無倫的事。做人難，你遇著d仆街冚家鏟，真係勞氣嘥氣。