美好的一天

經過兩天的沉澱，確認係美好的一天。

又係摺埋間公司的事。入紙去稅局，佢話唔得，稅項未清。相信係我太早入紙，而會計行又未做最後的手續的關係。冇辦法，唯有等。

咁即係要快快交埋今年的商業登記費，然後再入紙。但係等極都未有通知。上網查，嚇壞了寶寶，原來今年冇寬免，要交足二千二百五十元正。仆街了！

冇計，都要頂硬上。咁唯有去稅局，叫佢印過張收費通知書。於是上網卜期，十一月十四日，下午四時。

是日也，氣溫驟降，天光收工時尤其冷。想到黃之鋒，黎智英在監倉凍仆街我就開心囉！一於今朝去食粥，暖笠笠，有班仆街冇得食。叫碗豬紅粥，加個蘿蔔糕，正。回家後馬上捐入被窩眠一眠先。

中午起來，吃完飯就出發，順道去理髮。撞鬼，大頭文鬼咁好生意，所以冇留低吹水，直奔稅務大樓。如今稅局搬了往啓德，平生未去過，就當試下新屎坑。

鏡頭一轉，我向職員道明來意，佢就在電腦翻查資料。跟住同我講，阿叔，你入左紙話結業，咁咪冇繳費通知書囉！唔駛交呀。我立即開心拍掌。

走出大樓，覺得太陽底下，一切都好美好！過行人天橋，係新蒲崗，隨便亂行，想到因工作關係，已經很久未有如此四圍蕩了。一於放開胸懷，暢遊九龍東。行過啓德明渠，有錦鯉有鰂魚，都市奇景。渠另一邊係公屋，係乜邨呢？睇真d，原來係東頭村。聽就自細聽，原來在此。

咁咪即係就到九龍城？心中有了主意。就係買紅桃粿食。去到店裏，見有韭菜粿，一樣一個啦！當街就食起來。行出太子道，又見那間鬼五馬六的投注站，入去買條六合彩，一注獨得就和味咯！

過馬路，跳上小巴，就去了太子，行下金魚街啦！而家乜鬼都有，見到有袋寫住一個古怪名字，價錢八十九。我一睇，吊你啦！呢隻咪和味龍？以前當救生員，逢打風落雨，就成池都係，撈極撈唔完。現在變精品。豬仔魚一對要六十元，蒸條斑都得咯！

繼續去睇狗，想睇有冇食神幼犬。都係賣細狗多，一隻柴犬就二萬九，開玩笑。

輾轉又去了深水埗，原想去鴨街搵阿婆買條CD盤的傳動膠帶，但似乎阿婆已經退休。結果走左入蛇舖，食左碗蛇羹，今個冬天不怕冷了。

行到腳軟，要回家了。心中一直想，二千二百五十。。。哇哈哈！