緣份

星期日休息，眠到不省人事，但係不巧天氣惡劣，不停下大雨，數次被兩聲驚醒。頂硬上去訓，但係都要一早起身去自助洗衫。三點去會遇到易服癖，只好五點去。幸好一切順利，洗完衫都七點。唔理得咁多，一定要上水塘行下。

天氣唔好，人流都少。咁就最好勒。樹葉青綠、天氣涼爽，人生如此，夫復何求呢？

記掛住呂祖誕，照計圓玄學院，有乜工程，都要趕起啦。又走落去睇下。吊！仍然係停止開放。唉！緣份未至。

一路行返屋企，前後行左兩個鐘頭。左腿都冇痛過。但係晚上開工，仆街勒，好痺、好痛。唉！咁飄忽，捉唔到路，都唔知點對應。

不過我估，真係要認真想下減肥了。我現在未到百八磅，但係體脂呀，乜脂物脂，都唔駛講係超高。

幾十歲人，係未認真減過肥。我記得零六年去到百九磅，但當時未係咁老，知自己肥，就每天晨運，都冇特別做乜野，好快就一路減磅。

但係現在乜都老退，要肥就易，要減就難。乜野生酮，乜野一六八，我都冇去理解過。到底我要減澱粉？定係點呢？完全唔知。增加運動量就一定要，但係年紀大，乜都懶得做。

呢個大難題，要好好去思考思考。我睇我起碼要減十公斤、即係廿二磅，先會活得輕省。點做好呢？食量好難減，因為夜晚十二小時工作，晚餐唔敢減。早餐呢？餓左十幾個鐘，老虎都食得落。

又要想想，等我想想，我一定減到既。