大休息日

今朝收工，食過早餐，返屋企屙完屎，就馬上上床，因為有咳。最近我在努力部署戒煙。平時返工，見包煙所餘不足捱一個晚上，就會買定多一包，因為半夜百無聊賴，感受著生命中不能承受的輕之時，一支煙就係精神支柱，冇左佢就會囉囉攣。近日開始，決定改變習慣，唔買。咁半夜三更，雖然可以去附近便利店買，但係於禮不合，唯有死頂。一次，兩次，終於頂出成積。一些點係特別渴求尼古丁的，開始時都會想，想，想。過得一排，知道不能得呈，就會失去呢個渴望。可以捱到天光，想都唔想。可知人家所說的煙癮中的心癮，實為何事？有個煙鏟朋友講得好，就似傻佬失戀，個心成日想想想，想到失魂落魄，其實你唔去想，你就擺脫左佢。

又令我想起食神。每次我返屋企，天台的食神係會聽得出係我的腳步聲。開頭佢會發出哀鳴，希望我上去探佢。但係我一次唔理，兩次唔理，佢就死左條心。　

但係前晚，十二點就彈盡糧絕。到兩點，就開始咳。我估，係停左煙後，氣管的黏附物脫落引起的，以前的經驗就係咁。都唔理咁多，心諗，不失為一件好事。但係昨晚就不得了，係咁咳，係咁咳，但又唔係不停咳。會唔會係中左招呢？感覺個人有點累。所以，今朝收工，二話不說就攤抖。

＝＝＝

睡至差不多一點才醒，都訓左四個鐘，起身啦。有事要做，要搵錢。上月中稅局寄來不反對通知書，要三個月內，拎住呢張紙去公司註冊署要求取消註冊。你稅局拖我七個月，我拖返你半個月，畀足面你啦。動手下載表格，填表，打印。雖然我盡力去睇清楚，但始終年紀老邁，不排除睇漏。明天再核對一次，就出城攪掂佢。前後交兩份文件，合共要繳付六百九十元費用。會計師開價係六千元。如無阻滯，成功達陣，我自己做，就係用我腦力和勞力賺左五千三百元，好好披。

攪掂呢單野，個人覺得輕鬆。都拖延很久了。

＝＝＝

早兩日阿頭無端端捉住我呻，講到氣上心頭。我想講，你雖然剛剛裝左兩個支架，但係都唔激得，唔嬲得架。但係佢一輪嘴，我都搵唔到位搭嘴。

事後我各方求證，先知來龍去脈。

原來五一假期，公司安排我放假。事緣早前呢間公司生意淡薄要咳哥士，公眾假期都唔雖要我地外援幫手。但係後來一個資深的員工辭職，話要休息下喎，咁就弊。出手低，又請唔到新人，變左要我公司派兩個外援來。我就長駐，另一個就日日唔同。通常我痛苦的根源就係呢個外援。

本應每個月的更表，早一個月就要定。咁你四月時，就知五月一日係假期，你柯打係唔駛外援，就要自己正裝員工齊腳去應付工作。邊一行都好，冇事就冇事！有事呢？或者人頭落地喎。結果係五一當日，冇外援到場，阿頭放假，全場只得兩個正裝，巴基之星和自閉仔。

阿頭八點鐘打電話返來問，自閉仔話有外援到。但係後來又查實係冇。阿頭就火滾。因為佢話上頭通知佢會有外援到，點知係冇。最慶係自閉仔開頭話有。佢講到火起，問我有冇和自閉仔試過對話，我只話冇，查實經驗係，就算我同佢講野，佢都係直接忽略。阿頭話，佢自閉架，我要做埋輔導員呀！上頭又覆我話有外援到，但係又冇。咁點阿？有乜事，又係我第一線支援，有事就要到場。。。幾驚佢未裝支架條血管會塞呀。我都好為你著想，如果我講埋巴基之星有事就熄對講機，關人撚事，你有九個支架都冇用。

講到上頭，佢話，我剛剛滿六十五歲，公司要重新簽合同，我今次病假三個星期，係撈丕架！我只好表示，我一直聽緊，一有位，我就搭嘴，唉！真係唔著時。佢都發洩完畢，嘆一聲，唔著時。完畢。

＝＝＝

我曾經講過，我呢份工，性價比高，但人工低。你去打工，遇著個白痴老細，加一班白痴同事，幾高人工都會嘔血而亡。我可以在此前後工作一年，其中一個原因係呢個阿頭。佢知道我地呢Ｄ外援，人工有幾多，幫得幾多手。所以一般都只安排個閒位，你做到就做，唔做就閉一只眼。咁佢見我長駐，就同我講會安排多Ｄ職責，咁我又冇怨言，交足貨，佢都有報答之心。因為另外有兩個外援，一叫佢地做多Ｄ工作，就人間蒸發，有機會另外講。

先講下我地呢行，工時長係出名。十二個鐘！其實都唔止。一般要求你準時到場打咭。有Ｄ仲要你早三個字到，打咭換衫，列隊企好，阿頭檢閱，ＢＲＩＥＦＩＮＧ，咁先去開工。到收工時，就算有人接你位，你都要等夠鐘，排隊打咭先走得。實際唔止十二個鐘架，俗稱食夾棍。

但呢個阿頭，見下屬做到野，都會輪流放早，就連我呢個外援，都有份受惠，甚至試過，早一個鐘就走得。

各位打工仔，你有冇試過受到賞識，有回報？當年曾鈺成，就激到講左一句，你以為大家榮辱與共，但係就有辱無榮。結果就，嘿嘿！

我只能講，阿頭你心地唔錯，不過心臟唔好，保重啦。