我真係好爛口

昨日收工回家，想打開抽氣扇，點知又被油脂擎住了，動彈不得。吊佢老母，我忍你。下午落街買野，見到食神老豆在維修梯間的照明系統。都好耐冇見，吹下水，原來佢都有坐骨神經痛，仲戴住個腰封。問佢現在有冇去上堂，佢話有呀！學針灸囉！嘿！咁你學識，幫我針兩野啦。

去完街回來，見梯間光管著左，食神老豆仍在維修。我就話，喂！有電到喎，電死你呀仆街！佢話，要取電供個電鑽丫嘛。我話：咁你自己小心勒。

昨晚一夜思索，今日我都要攪定我把抽氣扇，順便清理好把風扇，好令夏日涼風颯颯。又係指定動作，哥士的開水，噴下，又用舊牙刷去刷下，去除油漬，咁佢就會郁動啦。我都好小心，關了電源才去清理，但係來來回回太多次，就有一次忘記拔插蘇，一摸。吊你老母呀！

重重一下電擊。驚魂甫定，再吊佢老母！試下把風扇，唔著喎。乜咁樣都會燒左把風扇？再買要花我一千幾百喎。想左一大爛餐。。。我應該試下其他電器。水煲，唔著、電燈唔著。去個電箱睇下，原來跳左總掣。

個電源係駁左冷氣機位，足足十五安倍。我剛才係有幾多電流通過我身體，才會跳總掣呢？

唉！咁都唔死得，我真係有排挨。韓愈話：窮極則呼天，痛極則呼父母。我生死關頭，係吊你老母。我真係爛口。