但係見到急凍雞隻，唔駛四十，就買來試試。放雪櫃下格一日解凍，昨日就浸白切雞。浸好才覺得自己衝動，咁大隻點食？第一餐只好先食雞腿雞翼，其他包好入雪櫃。
肉質嫩滑，並不太肥，亦冇乜雞味。飽到上頸，煩惱如何處理其他。想了成晚，都冇定案。
放工搭車回家途中，靈光一閃。走去買了十元八條腸粉五元芽菜仔。返到屋企，立即摷個湯包，先浸洗材料。然後拎個雞身出來起肉，個雞壳就用來煲湯。
用大火煲湯半小時，轉落電子瓦撐慢煮。就來炒腸粉。將雞肉拆絲，煎香腸粉，加芽菜，黃薑粉咖哩粉，就完成了一個星州雞絲炒腸粉。
食飽就去眠。訓到三點幾，起身飲湯。鬼佬雞不太肥，無理油脂，照飲，噢！哇！好清甜喎！睇返個湯包，係花旗蔘椰子湯，雖然只係蔘碎，都有陣清香。連飲三碗，正。
又到晚飯時間，將雪櫃內僅餘一條節瓜，切條，加上其餘雞絲炒埋一碟，又幾好味。至此隻雞已經完成任務。還有兩碗湯，明日再嘆。
問題又來了。尚有四條腸粉，半袋芽菜仔，點攪呢？
弊！我要減肥喎，咁樣食法，減條柒囉！
星州雞絲炒腸粉都俾你諗到，厲害！淨低既，咪豉油王炒腸粉食埋佢咯。
回覆刪除