奇奇怪怪

屋企附近有檔車仔麵。落單條麻甩佬，四，五十歲上下，每次點餐，都唔會順利。通常我先講湯，幼麵，響度食，然後再點送。但係佢總係會，哦！粗麵。或者，哦！撈麵。

開頭都會更正佢，但次次都係咁，就懶得嘥氣。你話佢懵咩，又唔係，每個送唔同價錢，佢心算好快，仲冇計錯數。

有時懶煮飯，就到工作地點附近買兩送飯。呢D大媽好衰，如果你直接揀送，佢就問你要唔要飯。你冚家都係要飯。

所以我一定先講兩送飯，才點送。其中一個大媽就連兩個送都記唔住，你要通菜加豬手，佢就話通菜蒸雞，你更正完，佢又重複一次，要你確認。

最後我想出個方法，就係伸隻手過櫃檯，叉開食指中指，指住我要的送，呢兩個。哦！呢兩個。以為和和氣氣有飯食，點知大媽問，要三送飯呀？

有時不禁問，呢兩條友，係咪有心玩鳩我呢？

你或者會話，你唔好覺得自己咁重要啦！邊撚個得閒玩你。但係掉返轉頭，你話佢地真係連咁簡單的應對都處理唔到，我對呢個世界就更絕望了。