最緊要夠照

雖然農曆七月已過，但怪事，濕滯事依舊。

最奇係一單空間轉移事件。某日，我買了兩件漢堡牛肉，即日食左一件。隔兩日，打算用來炒飯。先炒好飯底，就開雪櫃拎牛肉出來。但係牛肉不見了。

個雪櫃有幾大丫，一眼見晒。明明未食，去左邊？冇法，只能齋炒飯。想極想唔通。出街打個轉，再返來搵。原來放在米缸上面。係幾時拎出來的，已經無從得知，摸上手熱辣辣的，怕且都變壞了，只好掉了。

工作都麻撚煩。打風故然濕滯，冇車搭，要行成四十九幾分鐘才返到屋企。

星期六，阿頭放假，即係隨時可以闔眼訓。臨天光時，對講機傳來對話，自閉仔叫巴基之星上管理處。大鑊，警鐘響？其實我呢個外援，又係休息時間，大可以繼續訓，不過一種職人精神，驅使我立即從休息室趕出來。

一出來，就有個物流精英向我招手，一臉緊張咁。我走上去一睇，仆街，原來起火。又唔係好嚴重，係一部電唧，可能叉電器漏電起火，傍邊剛巧有木卡板，咁就燒著。原來消防已到，拎個滅火筒噴兩野就攪定。安全計，拉條喉噴下水。

消防阿蛇為安全起見，要上高處視察環境，睇下有冇火種未熄滅。現場得自閉仔和我，自閉仔講野鵪鶉咁，阿蛇當然搵我帶路。

查實我識條柒咩，因為平日工作根本唔會去呢d地方。只係想當然，應該係呢處卦，一定係，除非唔係。

上到去黑麻麻，阿蛇拎出電筒一照。哇！專業人員器材係唔同，搵到道閘，隔籬有個掣箱，打開閘，就搵到目的地。大功告成。

成件事最深刻的，是阿蛇支電筒。於是立即上淘寶網買，我估一定唔夠阿蛇支咁勁，但點都要有碌野傍身。