對朋友說話亦很難

幾個月前，朋友約出去飲酒，突然就話要結婚。我話：你講多次～～～我驚我聽錯。咁佢講到無懈可擊，連兄弟姊姊和個女都讚同，只能說：你鐘意就得啦。

三個月後，即係上星期，又再出來飲酒。幾杯屎水到肚，話題都係圍繞佢呢個新伴侶。佢現在已經用老婆來稱呼佢。但係佢都提到，佢兄弟和個女，都唔係咁認同咁快結婚。好明顯，佢有疑惑。

我都飲到啤啤孚，講野都冇邏輯。先講明，who am I to disagree，亦都冇其他人，包括你兄弟，個女、可以反對。我只係話，你又唔係有絕症，駛乜咁急趕？佢只係三個月就決定結婚，你真係認識清楚呢個人？我話：女人睇女人會睇得真D，你有三個家姐，你問下佢地意見丫。再加埋個女，參考下先啦。佢就話有兩個家姐都有問題，不足取信。咁仲有一個家姐丫。佢又冇講落去。

我又話，你之前講過，你十幾歲開始就有個女人在身邊，兩年前老婆過身，個女又出嫁，好唔習慣。會唔會影響左判斷力丫。佢話，呢個女人好善良，佢以前遇到D，個個都仆街，有個爛賭二，搶左佢條金鏈去變賣來賭。

我有話到口邊，都忍住左。你冇睇爾冬陞套門徒咩？白粉婆張靜初話係個老公渡佢升仙。到見到個老公古天樂，同一番話，角色對掉。你熱戀中就信晒一邊？

都係唔好講勒。