有得揀咩？

上次和老友隊啤，佢話佢老婆捉左佢去做袪斑療程，仲話真係有效。仲話希望可以優雅地老去。

我直接反應係，老就係老，唔好煩啦！

呢處帶出另一個問題。有時，有人講左句話，好好聽，就會被捧成金科玉律。好似貧窮限制想像，就根本係錯。貧窮係限制了選項。如果你想都唔敢想，咁唔係貧富問題了。

有次另一個朋友問我，頭髮白了幾成？我話都七七八八啦。佢話佢頭頂開始出現鳥巢了。我先發覺，佢咁怕老。

其實我第一次覺得開始有老態係四十零歲，出現老花之時。但係只有自己知，人地唔知丫。不過，從來冇覺得自己老。我五十多歲時，仍可行上大帽山頂，行麥徑八段返落城門，體能好好丫。係到近六十，經歷濕疹和抑鬱，體能才急速下降，面皮鬆弛。但我都唔覺自己老。

我學結他，記憶力和手指靈活度係差左，係必然情況，但我都唔覺自己老。你話胡楓老，我話佢唔老，只係到人生中某一個階段。

咁除左優雅地老去，仲有乜選項？猥瑣地老去？黯然地老去？暴風式老去？有得揀咩？