今個星期日呢？一定要塞爆佢。平日工作都唔忙，星期六晚就更清閒，巴基之友一早就來同我講，今晚早Ｄ訓。我知道夜巡今星期已來過兩次，今晚應該平靜過平安夜，十二點幾就眠了，到清晨時份，智能手錶話我聽，訓左成五個鐘。
我一早就盤算，今個星期日又去邊處玩呢？有兩個選項，第一，係要去拜呂祖，佢保我疫情期間平安，早就應該去，但係圓玄學院一直在維修，要去上水，粉嶺，實在太遙遠。去黃大仙咩？仆街，去廁所要收錢架。另一個選項，係去拜魯班先師。雖然我已經唔做軟件開發維護，但係咁多年來都冇參拜過，總覺得有虧欠，想去還個心願。但係去堅尼地城，又真係好遠喎。
天亮時，嗚嗚～～～下雨了。邊處都唔駛去。返屋企訓覺。
訓醒時已經係下午三點。點好呢？開電視睇跑馬。
電視機已經係十幾年高齡，早前就出現問題。每次開機都要等一大爛餐，佢先撻得著。以前大牛龜ＣＲＴ係要等一陣先著，估唔到現在ＬＣＤ都要等。而且愈來愈過份，最高紀錄係要四十五分鐘先著。解決問題係我強項，第一個選項，就係拎部電視上天台，掉左佢落街，然後買過部。不過大前提係要有錢。
咁，我就諗，諗諗諗。。。我咁撚聰明，梗係諗到啦。佢要一段時間先至著，即係要機件溫度夠高，佢先正常運作啦。至於係乜野零件壞，或者老化，係電容定係集成電路，我理柒佢啦。我搵到機底有個通風口，就用個吹頭髮的風筒，將熱氣吹入去。果然，不到五分鐘，佢就撻著。
至於咁樣會唔會傷到部機，我都不大理會。因為用左咁多年，又五癆七傷，用多一日都覺得賺左啦。
其實唔止電視係咁，連電腦都係咁。我照辦煮碗，一樣攪掂。
我的腦筋，唔止用於電器，更用到食物烹調之上。
我好喜歡食上海菜，尤其係酸辣湯。幾十年前，月薪大部份在銅鑼灣老正興燒掉。現在人窮，就要想辦法。上網睇了好多視頻，最靠譜就係星星師傅的方法。去買個炒三絲罐頭，當中有肉絲，菇絲和筍絲，自己另加木耳絲，豆腐絲，加醋加辣，咁就成事，食落都有酸有辣。但係我點會就咁滿足？心中已有腹稿，只要再加蝦壳滾湯，加蝦仁，鮮甜一定十足。再加豬皮，就更有趙口。當然，有錢就加海蔘粒啦。有了概念，只差實行。
另外，冬天梗係要食蛇羮啦。但係，去邊處買蛇呢？於是，我就用雞絲來扮蛇。第一次失敗了。痛定思痛，想到了錯在哪裏。第二次，就買隻雞髀，解凍，去皮，醃佢老母。跟住原隻蒸熟，攤凍後就可以拆絲。薑絲木耳絲冬菇絲陳皮絲，煮埋一煲，稠稠的打個芡，加重胡椒粉。食完暖笠笠，大成功呀！
現在，就要清熱解毒，然後就去試做羊腩煲了。
但係有樣野，我真係冇佢辦法，就係錢。本來有條數，話多唔多，但係夠我食成個星期。對方好合作，開了票就自動入落我戶口。但係銀行話彈票，原因係要蓋章／簽名。通知返對方，等了一大餐，先至話，可能係簽名個人，老到濛鳩查查，簽名簽得衰喎。又要等佢再開票。
真係唔明白。明明係我應得既，成世都係咁，咁多阻滯。要數返轉頭，有更多係有白撞友，要我免費幫佢做野。
只怪我生得文質彬彬，唔似開口埋口就吊人老母，佢地先會咁夠卜來博吊啦。
沒有留言:
發佈留言