唔操唔知身體老

參加了一個增肌減脂班，因為最近行山傷了右腳㬹，成個月都未好返。完全係因為過重才會受傷，之後日日受壓，才未能康復。所以好想練下肌肉，減返幾磅。

星期二係第一堂。動作唔難，但係點解總係提唔起對腳呢？部份動作係鍛鍊平衡力，又係完全唔達標。

我一路以為自己身體狀況良好，點知真係垂垂老矣。課室有一面大鏡，一小時的課堂未到一半，已見自己出現疲態。

冇計，不求長命百歲，只求少受肉體之苦。今後要多運動，將衰退減慢，餘生可以捱得冇咁辛苦。