又係我唔好

今日搭小巴，坐我隔鄰座位的女子，上車前已經講緊電話，坐低就繼續講。與她對話的人，可能係啞既，只聽到單向談話。我的內家修為都算不錯，一粒字都冇入耳。尚算頂得住。

下一站又有另一名女子上車，無巧不成話，一樣係無間斷單向通話。鄰座的婆娘，受到挑釁，就將聲量提高，節奏加快。新上車的，亦不甘示弱，同步推進。

就好似兩個結他手jam歌，你一句我一句，只不過是各有各彈，一個彈Hotel California, but you can never leave...另一個就彈Stairway to heaven, does anyone remember laughter...兩個結他手狂飊，又急又快，我就被震到內傷。

離目的地尚遠，我就叫有落，車埋站，鄰座婆娘話，我企起身畀你落，但仍捧住結他，籮柚冇移動過。

我話，你畀我離開呢部車啦！撞開一條血路，幾乎係跳落車。

落車後的一刻，耳際終於回復寧靜。我以後都要戴耳塞，開大音樂，咁樣搭車。