醉眼看世界

大約三個月前，提到一個陽光少年，從事餐飲業，由最低做起，終於成為餐廳經理兼合夥人，一個環境轉變，餐廳要結業。

今日我中午訓醒，食左碗雪梨雪耳紅棗糖水，見咁好天氣，就出去四圍逛。

去到海皮一個商場，一入門口就係一間餐廳，赫然就見到呢個年輕人。但係有好大轉變，全因我眼力好，才會認得出。

以前佢算係一個肥仔，幸好身高有返咁上下，咁就唔算太腫脹。如今成個瘦晒，你可以話，咁樣仲有型啦。。。不過，兩鬢已經斑白。佢頂多都係四十，咁大量白頭髮，就唔多正常。

睇裝束應該係經理級，但係見佢忙碌非常，騰來騰去，以往的笑容不見了，正一年初四咁面口。

無謂猜測太多，間餐廳係貴夾唔飽，食裝修多過食落肚的一種，我都唔會幫襯，亦都無謂相認，免得佢誤會我去落井下石。咁你都起碼有工作，現在還年輕，仲有大把世界。祝你好運啦。