乙巳蛇年：從心所欲

年廿九：下午無所事事，屎忽痕去左行花市。我都唔係想買花，志在湊熱鬧，正一係混吉。今年花市都幾多人，無謂迫，草草了事。個心想起，年初一要煎下糕應景，就走去買左急凍蘿蔔糕。黃昏洗晒D碗碟，清晒垃圾就拎去垃圾站掉。人地話初一唔掉垃圾丫嘛。

年初一：照原定計劃，一早就煎糕。我個不銹鋼鑊真係好難拿捏，煎到甩皮甩骨。食糕時想，不如去竹林禪院丫。行上山好辛苦，不如上城門水塘，行引水道，然後落山入禪院。如是者，行左個大運。去到禪院，唔知乜事，人頭湧湧，個齋堂坐滿人。只好草草了事就回家。出門前已經浸定齋菜材料，年初一就煮個南乳齋，一煲過，可以食三日。

年初二：睇鄉議局阿主席求簽，睇住係二十四，佢都當左二十。問個大媽，連個大媽都話係二十。咁都唔怪得阿主席，係車大元帥玩你。下午天氣和暖，又出街四圍岳。去到街市，走入魚欄，都有一半檔口營業。行左一輪，冇心水，都係返屋企。

年初三：雪櫃內的蔬菜和雞中翼，去到最後階段，剛好可以煮成一餐，新年期間，不假外求，全部自己煮。

年初四：凍肉舖啟市，買左兩塊豬扒。菜就要買貴菜啦，十蚊一包娃娃菜。繼續自煮自食。

年初五：雪櫃仲有半截白蘿蔔，上網學左做蘿蔔絲煎餅，只怕有心人，動手就不饒人。原來真係好簡單。不過落鹽重手左，鹹到苦。睇電視見到阿陳貓波，佢話社會對削減兩蚊乘車優惠有共識，現在就要研究點樣減。我如果在現場，我一定會話：個共識就係X你老母！新年流流要我發火。

年初六：昨日日以繼夜咁補眠，今日一早就要去自助洗衫，流年吉利，冇遇到易服癖。往時洗完衫，一定係去行水塘。今朝我又有新主意。今年過年都未去過飲茶，不如去象山邨啦，飲完茶就過大埔文武廟，都好耐冇去過咯。過年飲茶係一個情意結，年幼家貧，一年只得年初三才可以去茶樓一次。猶記得茶樓通處痰罐，又煙頭、又茶葉、當然，一定有痰。當然好核突啦，但係就種下我一鋪飲茶食點心的愛好。貓波話要削兩蚊優惠，梗係要搭盡佢啦。於是荃灣、大埔、元朗兜新界一圈。但係唔知係咪食錯野，由大埔去元朗途中，就腹中醞釀大災禍，未到元朗，就在錦上路落車，轉乘港鐵回家，幸好及時趕到，避免了災難。搭港鐵時睇即時新聞，大S死撚左。哇，乜咁大吉利是呀？美國呢幾日炒左兩架飛機加一架黑鷹直升機，今年真係開得麻麻地。

＝＝＝

睇返呢幾日，係咪好似想做乜就做乜，心想事成，從心所欲呢？孔夫子曰：七十而從心所欲不踰矩。好多唔識字扮博士的人，博晒懵，話我家陣七十，孔子都話從心所欲，我做乜都得，關你L事呀？！

其實，我只係有幾個卑微的願望，只要行得走得，有幾十蚊響個袋，咪可以想去邊就去邊，想食乜就食乜囉。無規矩不成方圓，事事都有前因後果，唔到你話事。

每年年尾，都有好多人，以新一年的年初一，或者立春的八字來推斷來年運程吉凶。查實呢，我都識少少。學得呢D野，梗係想知自己將來富貴窮通，妻財子祿等等。不過，當局者迷，硬係就睇唔到自己，或者唔想承認事實。

如今一把年紀，行過乜運，發生過乜事，鐵證如山，只好認命。其實我個八字係差到不得了。戊寅日生於亥月，要用丙火調候。但係八字中，全無半點火。都唔知點解到可以活到現在。

最攞命係要生得我正正常常，阿爸阿媽話畀心機讀書，日後做寫字樓，唔駛擔擔抬抬。咁我又讀書喎。讀得書多，阿媽又嫌我搵唔到錢，日鵝夜鵝。如果我一早識諗，就扮讀唔上，走去做車房，走去做廚房，或者而家會更好。

如果再識諗D，就學太監陳咁，托住老細隻腳，乜都唔駛做。無架，你都唔知醜，人地笑你正契弟，你笑返人，而家你做晒D功夫，我印印腳，有功就我領，邊個著數呀？

＝＝＝

所以呢，近日我成日睇電視。雖然電視冇野好睇，我都成日開住來睇。因為我咁辛苦擒高擒低，裝條天線，我要享受返我辛勞的成果。以後，我就係咁，不拔一毛以利天下，只做對自己有利的事，自己享受返個成果。